Pune Mumbai Expressway: सलग सुट्ट्यांमुळे फिरायला निघालाय? पुणे-मुंबई एक्सप्रेसवेवर 'ट्रॅफिक जॅम'! 5 KMपर्यंत वाहनांच्या रांगा

पुणे-मुंबई एक्सप्रेसवे आणि मुंबई-गोवा महामार्गावर सलग आलेल्या सुट्ट्यांमुळे पर्यटकांची प्रचंड गर्दी उसळली असून, दोन्ही प्रमुख मार्गांवर वाहनांच्या लांबच लांब रांगा लागल्या आहेत. खंडाळा घाट आणि माणगाव-इंदापूर परिसरात पर्यटकांना तासनतास वाहतूक कोंडीचा सामना करावा लागत आहे.

२६ जानेवारी (प्रजासत्ताक दिन) आणि जोडून आलेल्या शनिवार-रविवारच्या सुट्ट्यांमुळे नागरिक मोठ्या संख्येने पुण्याकडे आणि लोणावळा-महाबळेश्वरकडे पर्यटनासाठी बाहेर पडले आहेत.

यामुळे पुणे-मुंबई एक्सप्रेस हायवेवर वाहनांचा ओघ प्रचंड वाढला असून खंडाळा घाटात ४ ते ५ किलोमीटरपर्यंत वाहनांच्या रांगा लागल्या आहेत. विशेषतः अमृतांजन पुलाजवळ आणि घाट परिसरात वाहतूक संथ गतीने सुरू आहे.

दुसरीकडे, कोकणात जाणाऱ्या पर्यटकांच्या संख्येमुळे मुंबई-गोवा महामार्गावरही मोठी कोंडी पाहायला मिळत आहे. रायगड जिल्ह्यातील माणगाव आणि इंदापूर शहराजवळ वाहनांच्या रांगा लागल्या आहेत.

शनिवारपासून सोमवारपर्यंत सलग तीन दिवसांच्या सुट्ट्या असल्याने पर्यटकांनी कोकणातील समुद्रकिनारे आणि देवदर्शनाला पसंती दिली आहे, परिणामी महामार्गावर ताण वाढला आहे.

वाहतूक कोंडी सोडवण्यासाठी महामार्ग पोलीस आणि स्थानिक प्रशासन घटनास्थळी तैनात आहे. काही ठिकाणी 'ब्लॉक' देऊन वाहतूक सुरळीत करण्याचे प्रयत्न सुरू आहेत.

प्रवाशांनी संयम राखावा आणि वाहतुकीच्या नियमांचे पालन करावे, असे आवाहन महामार्ग पोलिसांकडून करण्यात आले आहे.