Weather Alert : तुफान आलंया! राज्यात पुन्हा जोरदार पाऊस, 16 जिल्ह्यांना अलर्ट

दक्षिण मध्य महाराष्ट्र आणि मराठवाड्याच्या काही जिल्ह्यांमध्ये हवामान विभागाने जोरदार पावसाचा इशारा दिला आहे. ताशी 30 ते 40 किमी वेगाने वारे वाहून या भागामध्ये हलका ते मध्यम पाऊस होऊ शकतो. पाहुयात 12 ऑगस्ट रोजी संपूर्ण राज्यामध्ये हवामानाची स्थिती कशी असेल.

मुंबई शहर आणि उपनगरामध्ये सामान्यतः ढगाळ आकाश राहणार असून काही ठिकाणी हलका ते मध्यम पाऊस गडगडाटासह होऊ शकतो. तर मुंबई शहर आणि उपनगरातील कमाल तापमान 32 अंश सेल्सिअस तर किमान तापमान 25 अंश सेल्सिअसच्या आसपास असेल.

12 ऑगस्ट रोजी मुंबई बरोबरच पालघर, ठाणे, रायगड, रत्नागिरी आणि सिंधुदुर्ग या जिल्ह्यांमध्ये जोरदार पावसाची शक्यता आहे. पालघर वगळता कोकणातील मुंबईसह उर्वरित सर्व जिल्ह्यांना हवामान विभागाने यलो अलर्ट जारी केला आहे.

पुणे शहरामध्येही हवामान विभागाने सामान्यतः ढगाळ आकाश राहण्याची शक्यता वर्तवली असून तुरळक ठिकाणी हलक्या ते मध्यम पावसाची शक्यता वर्तवली आहे. पश्चिम महाराष्ट्रातील सातारा आणि कोल्हापूर या जिल्ह्यांना हवामान विभागाने यलो अलर्ट जारी केला आहे. तर सांगली आणि सोलापूरमध्ये देखील अधूनमधून हलक्या ते मध्यम पावसाची शक्यता आहे.

उत्तर महाराष्ट्राच्या बाबतीत बोलायचं झाल्यास नाशिक, धुळे, जळगाव, नंदुरबार, नगर या जिल्ह्यांमध्ये सामान्यतः ढगाळ आकाश राहण्याची शक्यता असून तुरळक ठिकाणी हलक्या ते मध्यम पावसाची शक्यता आहे. मागील काही दिवसांपासून मराठवाड्यामध्ये जोरदार पाऊस होत आहे.

12 ऑगस्ट रोजीसाठी मराठवाड्यातील चार जिल्ह्यांना हवामान विभागाने यलो अलर्ट जारी केला आहे. यामध्ये धाराशिव, लातूर, नांदेड आणि बीड या जिल्ह्यांचा समावेश आहे. त्याचबरोबर छत्रपती संभाजीनगर, जालना, परभणी आणि हिंगोली या जिल्ह्यांमध्येही काही ठिकाणी मध्यम पावसाची शक्यता हवामान विभागाने वर्तवली आहे.

तर विदर्भातील यवतमाळ, नागपूर, चंद्रपूर, भंडारा, गोंदिया आणि गडचिरोली या सहा जिल्ह्यांना हवामान विभागाने यलो अलर्ट जारी केला आहे. या सहा जिल्ह्यांमध्ये वादळी वाऱ्यासह जोरदार पावसाची शक्यता हवामान विभागाने वर्तवली आहे.