Weather Alert : महाराष्ट्रात 'तो' पुन्हा परत आलाय, बुधवारी धुमाकूळ अनेक जिल्ह्यांना अलर्ट

राज्यातील हवामानात मोठे बदल जाणवत आहेत. थंडीची लाट पूर्णपणे ओसरली असून राज्यात आता उन्हाचा चटका जाणवू लागला आहे.

25 फेब्रुवारी रोजी बहुतांश भागात ढगाळ ते निरभ्र आकाश राहण्याचा अंदाज हवामान खात्याने वर्तवला आहे. विदर्भात मात्र काही भागांत अवकाळी पावसाची शक्यता हवामान खात्याने वर्तवली आहे.

मुंबई, ठाणे, रायगड, रत्नागिरी, सिंधुदुर्गमध्ये 25 फेब्रुवारी रोजी मुख्यतः निरभ्र ते अंशतः ढगाळ आकाश राहील. मुंबईत कमाल तापमान 32-34 अंश सेल्सिअस आणि किमान 24-25 अंश सेल्सिअस राहण्याची शक्यता आहे. सकाळी हलकी थंडी जाणवेल, मात्र दुपारी उकाडा वाढेल. त्यामुळे नागरिकांनी काळजी घ्यावी.

पुणे, सातारा, सांगली, कोल्हापूर, सोलापूर या भागांत कमाल तापमान 32-35 अंश सेल्सिअसपर्यंत जाईल, तर किमान 18-22 अंश राहील. पुण्यात दुपारी उन्हाचा तडाखा जाणवेल. कोल्हापूर, सांगली आणि सोलापूरमध्ये उष्ण आणि कोरडे वातावरण राहील.

नाशिक, धुळे, जळगाव, नंदुरबार भागात तापमानात चढ-उतार दिसेल. कमाल 32-34 अंश आणि किमान 18-21 अंश असेल. नाशिकमध्ये सकाळी थंडी जाणवेल, पण दुपारी उष्णता वाढेल.

छत्रपती संभाजीनगर, नांदेड, परभणी, लातूर, बीड, धाराशिव या जिल्ह्यांत कमाल तापमान 33-36 अंश सेल्सिअसपर्यंत पोहोचेल. किमान 20-23 अंश राहील.

नागपूर, अमरावती, अकोला, वाशिम, यवतमाळ, चंद्रपूर, गडचिरोली, भंडारा, गोंदिया या भागांत सर्वाधिक उष्णता जाणवेल. कमाल तापमान 34-37 अंश सेल्सिअस आणि किमान 21-24 अंश असेल. विदर्भातील चंद्रपूर आणि यवतमाळमध्ये अवकाळी पावसाची शक्यता असल्यामुळे हवामान खात्याने यलो अलर्ट दिला आहे. त्यामुळे नागरिकांनी योग्य ती काळजी घ्यावी.