20 मार्च नाही मग भारतात कधी साजरी केली जाणार ईद-उल-फितर? मौलानाने सांगितली अचूक तारीख

इस्लाम धर्मातील सर्वात पवित्र महिना म्हणजेच रमजानचा महिना 19 फेब्रुवारी 2026 रोजी सुरू झाला. रमजानच्या महिन्यात मुस्लिम बांधव रोजा (उपवास) ठेवतात. रमजानमध्ये 29-30 दिवस रोजा करून मगच ईद साजरी केली जाते. ज्याला ईद-उल-फितर किंवा मिठी ईद असे म्हटले जाते.

रमजानमधील 29 किंवा 30 दिवसांचा रोजा पूर्ण झाल्यानंतर, शव्वालच्या पहिल्या दिवशी ईद साजरी केली जाते. तथापि, इतर इस्लामिक सणांप्रमाणे, ईदची तारीख चंद्र दिसल्यानंतरच निश्चित केली जाते.

इस्लामिक कॅलेंडरच्या 10 व्या महिन्यात, शव्वालमध्ये चंद्र दिसल्यानंतरच ईदची अधिकृत तारीख निश्चित केली जाते. शव्वालचा चंद्र रमजानचा शेवट, आनंदाचा सण आणि उत्सव दर्शवितो.

ईद हा मुस्लिम धर्मातील सर्वात महत्त्वाचा सण आहे, जो श्रद्धेमध्ये आणि परंपरेत खोलवर रुजलेला आहे. जगभरातील मुस्लिम हा सण साजरा करतात. 2026 मध्ये ईदच्या तारखेबाबत अनेक चर्चा झाल्या आहेत आणि लोक त्या तारखेबद्दल उत्सुक आहेत.

भारतीय मुस्लिम मौलाना समीरुद्दीन कासमी यांनीही ईदच्या तारखेबद्दलच्या प्रश्नाचे उत्तर दिले आणि त्यांनी सोशल मीडियावर एक व्हिडिओ शेअर केला. व्हिडिओ पोस्ट करून त्यांनी ईद-उल-फितर नेमकी कधी साजरी केली जाईल याची माहिती दिली आहे.

समीरुद्दीन कासमी हे ब्रिटनमध्ये राहणारे एक भारतीय इस्लामिक विद्वान आहेत. ते इस्लामिक खगोलशास्त्र, हदीस, हनाफी न्यायशास्त्र आणि इस्लामिक धर्मशास्त्रात तज्ज्ञ आहेत. त्यांनी भारतात ईद कधी साजरी केली जाणार त्याची नेमकी तारीख काय असेल याबाबदल सांगितले आहे.

19 मार्च रोजी वेगवेगळ्या देशात चंद्राची स्थिती वेगवेगळी असेल. ईदीसाठी चंद्राची स्थिती 10 अंशावर असायला हवी पण या दिवशी 4 किंवा 5 अंश आहे, त्यामुळे 19 मार्च रोजी गुरुवारी चंद्र दिसणार नाही. तसेच त्यांच्या मते, 20 मार्चला 10 अंशांपेक्षा लक्षणीयरीत्या जास्त आहे. म्हणून, 20 मार्च रोजी चंद्र दिसेल आणि बराच काळ दृश्यमान राहील आणि 21 मार्च रोजी, या सर्व देशांमध्ये ईद-उल-फितर साजरी केली जाईल. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)