Weather Alert: पुढील 24 तास धोक्याचे, राज्यात मुसळधार पाऊस कोसळणार, 11 जिल्ह्यांना अलर्ट

राज्यात जोरदार पाऊस कोसळताना दिसत आहे. कोकणातील जिल्ह्यांमध्ये अनेक ठिकाणी अति मुसळधार, मध्य महाराष्ट्र आणि मराठवाड्यातील काही जिल्ह्यांमध्ये मुसळधार ते अति मुसळधार पावसाची शक्यता भारतीय हवामानशास्त्र विभागाने पुढील 24 तासांसाठी वर्तवली आहे. पाहुयात 30 ऑगस्ट रोजी राज्यामध्ये हवामानाची स्थिती कशी असेल.

मुंबई शहर आणि उपनगरात पुढील 24 तासात ढगाळ आकाशासह मुसळधार पावसाची शक्यता आहे. संध्याकाळी किंवा रात्री अधूनमधून जोरदार वारे वाहून मुसळधार पाऊस होण्याची शक्यता आहे.

तर मुंबईतील कमाल तापमान 30 अंश सेल्सिअस तर किमान तापमान 26 अंश सेल्सिअस एवढे राहील. पालघर, रायगड, रत्नागिरी आणि सिंधुदुर्ग या जिल्ह्यांना हवामान विभागाने यलो अलर्ट जाहीर केला आहे.

उत्तर महाराष्ट्रातील नाशिक, नंदुरबार, धुळे, जळगाव या जिल्ह्यांना यलो अलर्ट जारी करण्यात आला असून या जिल्ह्यांमध्ये जोरदार पावसाची शक्यता आहे.

पुणे, सातारा आणि कोल्हापूरच्या घाट भागावर मुसळधार पावसाची शक्यता आहे. संपूर्ण पश्चिम महाराष्ट्राला पावसासाठी कोणताही इशारा भारतीय हवामानशास्त्र विभागाने दिलेला नाही.

30 ऑगस्ट रोजी मराठवाड्यातही पावसाचा जोर कमी होण्याची चिन्हे आहेत. छत्रपती संभाजी नगर, जालना आणि परभणी या तीनच जिल्ह्यांना यलो अलर्ट जारी करण्यात आला आहे.

तर विदर्भातील सर्व 11 जिल्ह्यांना कोणताही इशारा हवामान विभागाने दिलेला नाही. परंतु विदर्भातील काही जिल्ह्यांमध्ये हलका ते मध्यम पाऊस होऊ शकतो.