Weather Alert : तुफान आलंया! महाराष्ट्रात शुक्रवारी पुन्हा वादळी पाऊस, 21 जिल्ह्यांना अलर्ट

सप्टेंबर महिन्यात राज्यातील विविध भागांत मुसळधार पाऊस झालाय. त्यानंतर काही दिवस पावसाने उघडीप दिली. त्यामुळे शेतकऱ्यांना दिलासा मिळाला होता. अशातच आता 2 ऑक्टोबरपासून राज्यात पुन्हा पावसाची शक्यता हवामान विभागाकडून वर्तवण्यात आली आहे. 3 ऑक्टोबर रोजीही राज्यातील मराठवाडा, उत्तर महाराष्ट्र आणि विदर्भात वादळी वाऱ्यासह पावसाची शक्यता वर्तवण्यात आली आहे. राज्यातील 21 जिल्ह्यांना पावसाचा यलो अलर्ट जारी करण्यात आला आहे. पाहुयात 3 ऑक्टोबर रोजी राज्यातील हवामानाची स्थिती कशी राहील.

मुंबईत 3 ऑक्टोबर रोजी हलक्या ते मध्यम स्वरूपाच्या पावसाची शक्यता आहे. मुंबईसह पालघर आणि ठाणे जिल्ह्यांतही हलक्या ते मध्यम स्वरूपाच्या पावसाची शक्यता वर्तवण्यात आली आहे. तर रायगड, रत्नागिरी आणि सिंधुदुर्ग जिल्ह्यांत मध्यम स्वरूपाचा पाऊस होण्याचा अंदाज आहे.

पश्चिम महाराष्ट्रात पुणे, कोल्हापूर, सातारा आणि सांगली येथे हलक्या ते मध्यम स्वरूपाचा पाऊस होण्याची शक्यता आहे. तर सोलापूर जिल्ह्यात वादळी वाऱ्यासह आणि विजांच्या कडकडाटासह पावसाचा इशारा देण्यात आला आहे. घाटमाथा परिसरात मध्यम स्वरूपाचा पाऊस होईल, असा अंदाज हवामान खात्याने वर्तवला आहे.

मराठवाडा विभागात छत्रपती संभाजीनगर आणि जालना येथे ढगांच्या गडगडाटासह हलक्या ते मध्यम स्वरूपाचा पाऊस होण्याची शक्यता आहे. तर परभणी, बीड, हिंगोली, नांदेड, लातूर आणि धाराशिव जिल्ह्यांत विजांच्या कडकडाटासह आणि वादळी वाऱ्यासह पावसाची शक्यता हवामान विभागाकडून वर्तवण्यात आली आहे. 6 जिल्ह्यांना पावसाचा यलो अलर्ट देण्यात आला आहे.

उत्तर महाराष्ट्रात धुळे आणि नंदुरबार येथे हलक्या ते मध्यम स्वरूपाचा पाऊस होणार आहे. तर जळगाव, नाशिक आणि अहिल्यानगर जिल्ह्यांत विजांच्या कडकडाटासह पावसाचा अंदाज असल्याचं हवामान विभागानं सांगितलंय. या तीन ठिकाणी देखील यलो अलर्ट जारी करण्यात आला आहे.

विदर्भात पावसाचा जोर काहीसा वाढण्याची शक्यता आहे. अकोला, अमरावती, भंडारा, बुलढाणा, चंद्रपूर, गडचिरोली, गोंदिया, नागपूर, वर्धा, वाशिम आणि यवतमाळ या सर्व जिल्ह्यांना वादळी वाऱ्यासह आणि विजांच्या कडकडाटासह पावसाचा इशारा देण्यात आला आहे. विदर्भातील सर्वच जिल्ह्यांना पावसाचा यलो अलर्ट जारी करण्यात आला आहे.

एकूणच 3 ऑक्टोबर रोजी राज्यात पावसाचा जोर वाढण्याची शक्यता आहे. राज्यातील 21 जिल्ह्यांना पावसाचा यलो अलर्ट असल्याने नागरिकांनी खबरदारी घेण्याचे आवाहन हवामान विभागाकडून करण्यात आले आहे.