Pune Weather: पुढील 24 तास धोक्याचे, पश्चिम महाराष्ट्रात जोरदार पावसाची शक्यता, 3 जिल्ह्यांना अलर्ट

राज्यात सुरू असलेला पावसाचा जोर काहीसा ओसरण्याची शक्यता आहे. आज दिनांक 28 जुलै रोजी कोकण, घाटमाथ्यावर जोरदार सरींची शक्यता आहे. पुणे जिल्ह्याच्या घाटमाथ्यावर जोरदार पावसाचा अंदाज असल्याने दक्षतेचा ऑरेंज अलर्ट आहे. तर रायगड, रत्नागिरी, सातारा आणि कोल्हापूरच्या घाटमाथ्यावर सतर्कतेचा इशारा हवामान विभागाने दिला आहे.

मागील 24 तासात पुणे जिल्ह्यात 8.2 मिलीमीटर पाऊस नोंदविण्यात आला. यावेळी कमाल तापमानाचा पारा 26.3 अंश सेल्सिअसवर होता. पुढील 24 तासात पुणे घाटमाथ्यावर जोरदार पावसाची शक्यता असल्याने दक्षतेचा ऑरेंज अलर्ट हवामान विभागाने दिला आहे. तसेच उर्वरित पुणे जिल्ह्यात हलक्या पावसाचा अंदाज हवामान विभागाकडून वर्तवण्यात आला आहे. पुढील 24 तासात पुण्यातील कमाल तापमान 28 तर किमान तापमान 22 अंश सेल्सिअस इतके राहील.

सातारा जिल्ह्यात मागील 24 तासात जोरदार पाऊस कोसळला. सातारा परिसरामध्ये 8 मिलिमीटर पावसाची नोंद झाली. पुढील 24 तासात साताऱ्यातील कमाल तापमान 25.6 अंश सेल्सिअस राहिले. सातारा घाटमाथ्यावर जोरदार पावसाची शक्यता असल्याने यलो अलर्ट हवामान विभागाने व्यक्त केला आहे.

कोल्हापूर जिल्ह्यात मागील 24 तासात 20 मिलीमीटर पावसाची नोंद झाली. यावेळी कमाल तापमान 23.8 अंश सेल्सिअस राहिले. पुढील 24 तासात कमाल तापमान 25 अंशावर राहिल. तसेच कोल्हापूर घाटमाथ्यावर जोरदार पावसाची शक्यता असल्याने दक्षतेचा यलो अलर्ट हवामान विभागाकडून वर्तवण्यात आला आहे.

सोलापूर जिल्हात मागील 24 तासात 3 मिलीमीटर पावसाची नोंद झाली. यावेळी कमाल तापमानाचा पारा 25.7 अंशावर राहिला. पुढील 24 तासात कमाल तापमान 27 अंशावर राहण्याची शक्यता आहे. तसेच सोलापूर जिल्ह्यात हलक्या पावसाची शक्यता कायम आहे.

मागील 24 तासात सांगली जिल्ह्यामध्ये 5 मिलीमीटर पावसाची नोंद झाली. पुढील 24 तासात ढगाळ आकाशासह मध्यम पावसाची शक्यता हवामान विभागाने वर्तवली आहे. यावेळी जिल्ह्यातील कमाल तापमान 27 तर कमान तापमान 22 अंश सेल्सिअस इतके राहील.

पश्चिम महाराष्ट्रातील सर्वच जिल्ह्यांत हलक्या ते मध्यम पावसाची शक्यता आहे. पुणे घाटमाथ्यावर जोरदार पावसाची शक्यता असल्याने सतर्कतेचा ऑरेंज अलर्ट भारतीय हवामान विभागाने दिला आहे. तसेच राधानगरी, चांदोली धरणांतून पाण्याचा विसर्ग नदीपात्रात सुरु आहे. त्यामुळे नदीकाठावरील लोकांनी सतर्क राहणे आवश्यक आहे.