बाप्पा मोरया...श्रीमंत दगडूशेठ गणपतीला तब्बल 1100 नारळांचा महानैवेद्य!

गाणपत्य संप्रदायात कार्तिक शुद्ध चतुर्थी, श्री उमांगमलज जन्मोत्सवात मोरयाला नारळ समर्पित करण्याला विशेष महत्त्व आहे. अंतःकरणातील अहंकाराचं मळभ दूर झाल्यावर शुद्ध, स्वच्छ, प्रशांत स्वरूपातील जे परमात्म दर्शन घडतं, त्याला म्हणतात उमांगमलज. दगडूशेठ गणपती मंदिरात हा जन्मोत्सव मोठ्या उत्साहात साजरा केला जातो. यंदा यानिमित्त श्रींना 1100 नारळांचा महानैवेद्य दाखविण्यात आला.

श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळातर्फे मंदिरात श्री उमांगमलज जन्मोत्सव सोहळ्याचं आयोजन करण्यात आलं होतं. यानिमित्तानं नारळांची आरास करण्यात आली, तसंच मंदिरात विविध धार्मिक विधी पार पडल्या.

पहाटे 3 वाजता ब्रह्मणस्पती सूक्त, पहाटे 4 ते सकाळी 6 वाजताच्या दरम्यान गायिका रसिक कुलकर्णी आणि सानिका कुलकर्णी यांचा स्वराभिषेक कार्यक्रम पार पडला. यावेळी अक्षय भडंगे यांनी तबल्याची साथ दिली, तर यश जवळकर यांनी ऑक्टपॅड वादन केलं. त्यानंतर 8 वाजता गणेश याग पार पडला.

ट्रस्टचे अध्यक्ष सुनिलभाऊ रासने यांनी यावेळी सांगितलं, 'देवी पार्वतीनं अंगावरच्या मळापासून एक पुतळा बनवला. त्याला जिवंत केलं. पुढे त्याचं आणि शंकरांचं युद्ध झालं. भगवान शंकरांनी त्या मुलाचं मस्तक उडविलं. देवी पार्वतीच्या संतापाला शांत करण्यासाठी शेवटी त्या बालकाच्या धडावर भगवान श्री विष्णूंनी आणलेलं गज मस्तक बसविण्यात आलं. त्यांना श्री गजानन म्हटलं जातं. ही श्री गणेश जन्माची कथा आपण नेहमी ऐकतो. या कथेतील अवतारात भगवान श्री गणेशांचं नाव आहे उमांगमलज.

उमांगमलज या शब्दाचा अर्थही सुनिलभाऊ रासने यांनी सांगितला. ते म्हणाले, 'उमा म्हणजे देवी पार्वती. तिच्या अंगावरील मळापासून जन्माला आलेला, असा या शब्दाचा अर्थ आहे.

सुनिलभाऊ रासने यांनी यावेळी अतिशय सुंदर विचार मांडला. 'पुतळा म्हणण्याइतका मळ देवी पार्वतीच्या अंगावर असेल तरी कसा?' असा प्रश्न त्यांनी उपस्थित केला. ते म्हणाले, 'आपण हे लक्षात घ्यायला हवं की, या सर्व कथा अध्यात्याचं निरूपण करण्यासाठी असतात.'

सुनिलभाऊंनी सांगितलं, 'आपली बुद्धी हीच पार्वती देवी आहे. तिच्यावर चढलेला अहंकाराचा थर हाच मळ आहे. हा अहंकार दूर झाला की, ज्या मोरयांची प्राप्ती होते त्यांना उमांगमलज म्हणतात.