दररोज हनुमान चालीसा वाचावी का, काय होतो परिणाम आणि फायदा?

आजच्या धावपळीच्या आणि तणावपूर्ण जीवनात प्रत्येक व्यक्ती शांती आणि शक्तीच्या शोधात असते. हिंदू धर्मात भगवान हनुमानाला 'संकटमोचन' म्हटले जाते, जो आपल्या भक्तांची सर्व संकटे हरतो. गोस्वामी तुलसीदास रचित 'हनुमान चालीसा' हे केवळ एक स्तोत्र नसून ते ऊर्जा आणि आत्मविश्वासाचा महास्त्रोत मानले जाते. ज्योतिषशास्त्र आणि अध्यात्माच्या मते, दररोज हनुमान चालीसाचे पठण केल्याने व्यक्तीच्या जीवनात अनेक चमत्कारिक बदल घडतात. पण नक्की का करावा हा पाठ? जाणून घेऊया त्यामागील रहस्य आणि होणारे फायदे.

भीती आणि नकारात्मकतेचा नाश: हनुमान चालीसातील एक प्रसिद्ध ओळ आहे - "भूत पिशाच निकट नहिं आवै, महाबीर जब नाम सुनावै". दररोज पाठ केल्याने मनातील अज्ञात भीती दूर होते आणि घरातील नकारात्मक ऊर्जा नष्ट होऊन सकारात्मकतेचा संचार होतो.

आत्मविश्वास आणि धैर्यामध्ये वाढ: अनेकदा आपण महत्त्वाच्या कामात आत्मविश्वासाच्या अभावामुळे मागे पडतो. हनुमान चालीसा वाचल्याने मनोबल वाढते. यामुळे कठीण प्रसंगात संयम राखण्याची आणि धैर्याने संकटाचा सामना करण्याची शक्ती मिळते.

आर्थिक अडचणींतून मुक्ती: असे मानले जाते की, हनुमंत हे अष्टसिद्धी आणि नवनिधीचे दाता आहेत. जर कोणी आर्थिक संकटात असेल आणि श्रद्धेने या चालीसाचा पाठ करत असेल, तर त्याच्या उत्पन्नाचे मार्ग खुले होतात आणि कर्जाच्या समस्येतून सुटका मिळते.

आरोग्य लाभ आणि रोगांपासून मुक्ती: "नासै रोग हरै सब पीरा, जपत निरंतर हनुमत बीरा". रोजच्या पठणामुळे शारीरिक व्याधी कमी होतात. जे लोक दीर्घ आजाराने त्रस्त आहेत, त्यांना मानसिक बळ मिळते आणि प्रकृतीत वेगाने सुधारणा होते.

ग्रहांच्या पिडेपासून संरक्षण: विशेषतः शनीची साडेसाती किंवा राहू-केतूचा दोष असलेल्या व्यक्तींनी हनुमान चालीसा वाचणे अत्यंत गुणकारी मानले जाते. हनुमानजींच्या भक्तांना शनी देव कधीही त्रास देत नाहीत, असे वचन स्वतः शनी देवांनी दिले आहे.

बुद्धी आणि विद्या प्राप्ती: विद्यार्थ्यांसाठी हनुमान चालीसा वरदान आहे. यात हनुमानाला "विद्यावान गुनी अति चातुर" म्हटले आहे. रोजच्या पठणामुळे एकाग्रता वाढते, स्मरणशक्ती तीव्र होते आणि अभ्यासात येणारे अडथळे दूर होतात. टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)