Sanju Samson : वर्ल्ड कपच्या पहिल्या मॅचआधीच संजूचा निर्णय झाला, ओपनिंग कोण करणार? सूर्याने क्लिअर केलं!

वर्ल्ड कपच्या आधी झालेल्या न्यूझीलंडविरुद्धच्या 5 मॅचच्या सीरिजमध्ये संजू सपशेल अपयशी ठरला. 5 सामन्यांमध्ये संजूने 9.20 च्या सरासरीने फक्त 46 रन केले. संजूच्या या फॉर्मने वर्ल्ड कपआधी टीम इंडियाचं टेन्शन वाढवलं होतं.

दक्षिण आफ्रिकेविरुद्धच्या सराव सामन्यात कर्णधार सूर्यकुमार यादवने टॉस जिंकला आणि बॅटिंगचा निर्णय घेतला. यानंतर त्याला ओपनिंगला कोण खेळणार? असं विचारण्यात आलं, तेव्हा त्याने अभिषेक शर्मा आणि इशान किशन यांचं नाव घेतलं.

सराव सामन्यामध्ये अभिषेक शर्मा आणि इशान किशन ओपनिंगला खेळत असतील, तर टी-20 वर्ल्ड कपमध्येही हे दोघंच ओपनिंगला खेळण्याची शक्यता आहे. त्यामुळे टी-20 वर्ल्ड कपच्या प्लेइंग इलेव्हनमधून संजूचा पत्ता कट होईल, असं मानलं जातंय.

संजूला बाहेर केलं तर त्याच्याऐवजी तिलक वर्मा टीममध्ये येईल. दुखापतीमुळे तिलकला न्यूझीलंडविरुद्धच्या सीरिजमध्ये खेळता आलं नव्हतं. अभिषेक आणि इशान ओपनिंगला तर तिलक वर्मा तिसऱ्या क्रमांकावर बॅटिंग करेल.

आशिया कपच्या आधीपर्यंत संजू सॅमसन हा उत्कृष्ट फॉर्ममध्ये होता, पण शुभमन गिलचं टीममध्ये कमबॅक झाल्यानंतर संजूला मिडल ऑर्डरमध्ये बॅटिंग करावी लागली, त्यानंतर त्याचा संघर्ष सुरू झाला.

दुसरीकडे गिलही खराब फॉर्ममुळे टी-20 टीममधून बाहेर झाला आणि त्याच्याऐवजी पुन्हा एकदा संजू ओपनिंगला आला, पण त्यानंतरही संजूला त्याची जुनी चमक दाखवता आली नाही, त्यामुळे गिलपाठोपाठ आता संजूही टीम इंडियाबाहेर होण्याच्या मार्गावर आहे.