TRENDING:
विमानतळ प्रशासनाने दिलेल्या माहितीनुसार, गेल्या दोन दिवसांपासून पुणे विमानतळावर येणाऱ्या विमानांना उशीर होत असल्यामुळे येथील उड्डाणांचं वेळापत्रक विस्कळीत झालं आहे. लोहगाव विमानतळावरून दररोज 200 हून अधिक विमानांची ये-जा असते, ज्यामधून सुमारे 32 ते 33 हजार प्रवासी प्रवास करतात. मात्र, वेळापत्रक बिघडल्यामुळे अनेक प्रवाशांना विमानतळावर ताटकळत बसावं लागलं.
advertisement
गुरुवारी रात्रीपासूनच विमानांच्या वेळापत्रकात अनियमितता दिसून आली. मध्यरात्री १२ ते सकाळी ६ या वेळेत बंगळूरु, चेन्नई, नागपूर, दिल्ली, कोलकाता यांसारख्या प्रमुख शहरांतून पुण्यात दाखल होणाऱ्या विमानांना प्रामुख्याने उशीर झाला. दरम्यान, प्रशासनाने या विलंबाचं कारण स्पष्ट करताना सांगितलं की, उत्तर भारतात थंडीच्या लाटांमुळे निर्माण होणारे दाट धुके हे एक महत्त्वाचे कारण असू शकते, ज्याचा परिणाम थेट विमानांच्या उड्डाण आणि लँडिंगवर झाला आहे. अशा हवामानामुळे विमानांना त्यांच्या मूळ ठिकाणावरूनच उशीर होत असल्याने, पुणे विमानतळाचे वेळापत्रकही बिघडले आहे.
वैमानिकाचा उड्डाणास नकार
दरम्यान, २-३ दिवसांपूर्वीच पुणे विमानतळावरून आणखी एक घटना समोर आली होती.यात दोन वेगवेगळ्या विमानांच्या वैमानिकांनी उड्डाण करण्यास नकार दिल्याने मोठा गोंधळ निर्माण झाला. या प्रकारामुळे पुणे-दिल्ली आणि पुणे-अमृतसर या दोन विमानांच्या वेळापत्रकात तीन तासांहून अधिक विलंब झाला. परिणामी प्रवाशांचा खोळंबा झाला आणि त्यांनी संताप व्यक्त केला. 'माझी कामाची वेळ संपली' असं सांगून विमानांच्या वैमानिकांनी उड्डाण करण्यास नकार दिला होता.