भाजप उमेदवार मुरलीधर मोहोळ (BJP Murlidhar Mohol) यांना पहिल्या फेरीपासून आघाडी मिळाली. विशेषतः शहरी भागात मोहोळ यांना मोठ्या प्रमाणात मतदान झालं. शहरी भागातून मतदान मिळवण्यास घंगेकर कमी पडल्याचं पाहायला मिळालं.
पुणे लोकसभा (Pune Loksabha Election) ही काँग्रेसची तशी परंपरागत जागा. मात्र जवळपास 10 वेळा खासदार निवडून आणणाऱ्या काँग्रेसची ही जागा मोदी लाटेत म्हणजेच 2014 साली भाजपकडे गेली. कधीकाळी हा मतदारसंघ माजी केंद्रीय मंत्री सुरेश कलमाडी यांचा बालेकिल्ला म्हणून ओळखला जायचा. पण मोदी लाटेत अनिल शिरोळे आणि त्यानंतर गिरीश बापट यांनी पुणे लोकसभेवर विजय मिळवला. मुख्यत: काँग्रेस विरुद्ध भाजप अशीच पुणे लोकसभेत लढत होते.
advertisement
‘वंचित’, ‘एमआयएम’ फॅक्टर किती महत्त्वाचा?
वंचित बहुजन आघाडीचे उमेदवार वसंत मोरे हे निवडणुकीपूर्वी महाराष्ट्र नवनिर्माण सेनेमध्ये होते. मनसेला जय महाराष्ट्र करत त्यांनी वंचित बहुजन आघाडीकडून उमेदवारी मिळवली होती. गेल्या निवडणुकीत वंचितचे उमेदवार अनिल जाधव यांना 65 हजार मते मिळाली होती. मात्र, त्यावेळी वंचित आणि ‘एम्आयएम’ हे एकत्र होते. आता ‘एमआयएम्‘ने सुंडके यांना मैदानात उतरवलं होतं. मोरे आणि सुंडके यांनी जास्त मते घेतल्यास मोहोळ यांचा मार्ग सुकर होणार तर ही मते मिळविण्यात धंगेकर यशस्वी झाल्यास मोहोळ यांच्या अडचणीत वाढ होणार असं काहीसं गणित राजकीय विश्लेषकांनी बांधलं होतं.
वाचा - निलेश लंके पुन्हा ठरणार जायंट किलर? नगर दक्षिणमधून धक्कादायक आकडेवारी समोर
आतापर्यंत 3 नगरसेवक संसदेत
पुणे लोकसभा मतदारसंघ हा काँग्रेसचा बालेकिल्ला समजला जात होता. मात्र, 1991 च्या लोकसभा निवडणुकीत याला पहिल्यांदा सुरुंग लागला. अण्णा जोशी यांच्या माध्यमातून भाजपचा पहिला खासदार पुण्यात निवडून आला. 2014 मध्ये अनिल शिरोळे यांनी काँग्रेसचे विश्वजीत कदम यांचा पराभव केल्यानंतर तेव्हापासून पुण्यावर भाजपचे वर्चस्व आहे. 2019 मध्ये गिरीश बापट हे निवडून आले. बापट यांच्या निधनामुळे भाजपने मोहोळ यांच्या माध्यमातून तरुण चेहरा दिला. पुणे लोकसभेतील आजवरच्या खासदारांपैकी अण्णा जोशी. गिरीश बापट आणि अनिल शिरोळे हे तीन भाजपचे नगरसेवक खासदार झाले आहेत. आता आणखी एक नगरसेवक संसदेत जाणार आहे.