एक असं शिवलिंग जे दिवसातून 3 वेळा बदलत रंग, त्रेतायुगाशी आहे खास संबंध; तुम्हाला माहिती आहे का हे मंदिर?

भगवान परशुराम आणि शिवलिंगाची कथा

पौराणिक कथेनुसार, त्रेतायुगात भगवान परशुराम हे परम शिवभक्त होते. त्यांनी आपल्या कडक तपश्चर्येने महादेवाला प्रसन्न केले होते. परशुरामांची इच्छा होती की, महादेवांनी सदैव त्यांच्या सोबत राहावे. त्यांच्या भक्तीवर प्रसन्न होऊन महादेवांनी त्यांना एक शिवलिंग दिले आणि सांगितले की, "हे परशुरामा, तू हे शिवलिंग घेऊन जा, पण लक्षात ठेव, जिथे तू हे शिवलिंग जमिनीवर ठेवशील, तिथेच ते कायमचे स्थिरावेल."

advertisement

भगवान परशुराम ते शिवलिंग घेऊन कैलास पर्वतावरून निघाले. प्रवासादरम्यान धौलपूरच्या चंबळ नदीच्या काठी असलेल्या विस्तीर्ण जंगलात पोहोचल्यावर त्यांना विश्रांतीची गरज भासली. नकळत त्यांनी ते शिवलिंग जमिनीवर ठेवले. विश्रांतीनंतर जेव्हा त्यांनी शिवलिंग उचलण्याचा प्रयत्न केला, तेव्हा ते तिथून हलले नाही. महादेवांच्या सांगण्याप्रमाणे ते शिवलिंग तिथेच 'अचल' झाले, म्हणून या मंदिराला 'अचलेश्वर महादेव' असे नाव पडले.

दिवसातून तीनदा रंग बदलणारे शिवलिंग

अचलेश्वर महादेव मंदिरातील शिवलिंगाचे रहस्य आजही विज्ञानाला उलगडलेले नाही. हे शिवलिंग दिवसातून तीन वेळा रंग बदलते: 1. सकाळी: शिवलिंगाचा रंग लाल असतो. 2. दुपारी: सूर्याच्या प्रकाशात हे शिवलिंग केशरी किंवा पिवळसर रंगाचे दिसते. 3. संध्याकाळी: शिवलिंगाचा रंग पूर्णपणे काळा किंवा गडद सावळीचा होतो. शास्त्रज्ञांनी यावर अनेक संशोधनं केली, पण नैसर्गिक प्रकाशामुळे की दगडाच्या विशिष्ट गुणामुळे हा बदल होतो, याचे ठोस कारण अद्याप मिळालेले नाही. भक्तांच्या मते, हा महादेवांचा साक्षात चमत्कार आहे.

पाताळापर्यंत गेलेली मुळे

या मंदिराबाबत आणखी एक प्रसिद्ध कथा सांगितली जाते. अनेक वर्षांपूर्वी काही लोकांनी या शिवलिंगाची खोली मोजण्यासाठी त्याच्या बाजूला खोदकाम सुरू केले. अनेक दिवस खोदकाम करूनही शिवलिंगाचा मूळ सापडला नाही. लोक जितके खोल खोदायचे, शिवलिंग तितकेच खाली वाढत असल्याचे त्यांना दिसले. अखेर हार मानून लोकांनी खोदकाम थांबवले. यामुळेच याला 'पाताळेश्वर' रूपातही पूजले जाते.

टीप : (वरील माहिती सामान्य माहितीवर आधारीत आहेत. न्यूज 18 मराठी याची पुष्टी करत नाही. आपला उद्देश तुमच्यापर्यंत माहिती पोहोचवण्याचा आहे.)