'30 वर्षांच्या विवियन किंग्मा याने बेंझॉयलेक्गोनिन घेतल्याचं चाचणीमध्ये स्पष्ट झालं आहे. बेंझॉयलेक्गोनिन हे आयसीसी अँटी-डोपिंग कोड अंतर्गत गैरवापराचा पदार्थ म्हणून वर्गीकृत केलेलं कोकेन मेटाबोलाइट आहे', असं आयसीसीने एका निवेदनात म्हटले आहे. किंग्मा याला 15 ऑगस्टपासून 3 महिन्यांचा अपात्रतेचा कालावधी देण्यात आला आहे. जर किंग्माने मान्यताप्राप्त उपचार कार्यक्रम समाधानकारकपणे पूर्ण केला आहे हे सिद्ध केले तर ही मुदत एक महिन्यापर्यंत कमी केली जाऊ शकते, असं आयसीसीने सांगितलं आहे.
advertisement
किग्माने 12 मे रोजी झालेल्या त्या सामन्यात युएईविरुद्ध 0/20 चा स्पेल टाकला होता. त्यानंतर त्याने नेपाळ आणि स्कॉटलंडविरुद्ध दोन वनडे सामने आणि एक टी20 सामना खेळला आहे. आयसीसी अँटी-डोपिंग कोडनुसार, चारही सामन्यांमधील त्याचे रेकॉर्ड अपात्र ठरवले जातील. आयसीसी अँटी-डोपिंग नियम स्पष्ट आणि कडक आहेत.
"प्रत्येक खेळाडूचे वैयक्तिक कर्तव्य आहे की त्याच्या शरीरात कोणताही प्रतिबंधित पदार्थ प्रवेश करू नये. त्याच्या/तिच्या नमुन्यात आढळलेल्या कोणत्याही प्रतिबंधित पदार्थासाठी खेळाडू जबाबदार असतो," असे आयसीसीच्या डोपिंग विरोधी आचारसंहितेमध्ये म्हटले आहे.
गेल्या 12 महिन्यात आंतरराष्ट्रीय खेळाडूंना अशा औषधांच्या वापरासाठी बंदी घालण्यात आल्याची ही तिसरी घटना आहे, दक्षिण आफ्रिकेचा कागिसो रबाडा आणि न्यूझीलंडचा डग ब्रेसवेल यांच्यानंतर आता किग्माची टेस्टही पॉझिटिव्ह आली आहे. रबाडाचा निकाल काही आठवड्यांसाठी गुप्त ठेवण्यात आला होता. आयपीएल 2025 च्या मध्येच रबाडाने गुजरातची साथ सोडली आणि दक्षिण आफ्रिकेत जाऊन त्याने उपचार घेतले, यानंतर तो आयपीएल खेळण्यासाठी परत आला.