रोहित- विराटचं पाकिस्तानी फॅनला गिफ्ट
टीम इंडियाच्या प्रॅक्टिसआधी एका पाकिस्तानी चाहत्याला त्याचे दोन आवडते खेळाडू रोहित शर्मा आणि विराट कोहली यांची ऑटोग्राफ मिळाली, त्यामुळे तो खूप आनंदी झाला. भारतीय टीम सरावासाठी हॉटेलमधून बाहेर पडली, तेव्हा हा चाहता टीम बसजवळ उभा होता. यादरम्यान त्याने आधी विराट कोहलीला आरसीबीच्या जर्सीवर ऑटोग्राफ द्यायची विनंती केली, यानंतर विराटने हसतमुखाने त्याची ही इच्छा पूर्ण केली.
advertisement
रोहित शर्माने या पाकिस्तानी चाहत्याकडे असलेल्या भारतीय टीमच्या जर्सीवर ऑटोग्राफ केली. एकाच दिवशी या दोन महान खेळाडूंच्या ऑटोग्राफ मिळाल्यामुळे पाकिस्तानी चाहत्याचा आनंद गगनात मावेनासा झाला.
नुकत्याच झालेल्या आशिया कपमध्ये भारत आणि पाकिस्तानच्या खेळाडूंनी मैदानात हस्तांदोलन केलं नाही, त्यामुळे तणाव निर्माण झाला होता. फक्त खेळाडूच नाही तर दोन्ही बाजूंच्या चाहतेही सोशल मीडियावर एकमेकांसोबत भिडत होते. पण ऑस्ट्रेलियामध्ये मात्र वेगळंच घडलं. विराट आणि रोहितच्या या कृतीनंतर काही चाहत्यांनी नाराजीही व्यक्त केली आहे. दोन्ही देशांमध्ये तणाव असताना विराट आणि रोहितने असं करायला नको होतं, अशा प्रतिक्रिया काही जणांनी दिल्या आहेत. तर हा फॅन पाकिस्तानचा आहे हे विराट रोहितला माहिती नव्हतं, असंही काहींचं म्हणणं आहे.
विराट-रोहितकडे लक्ष
भारत-ऑस्ट्रेलिया यांच्यातल्या वनडे सीरिजदरम्यान चाहत्यांचं लक्ष विराट कोहली आणि रोहित शर्मा यांच्याकडे आहे. चॅम्पियन्स ट्रॉफीच्या फायनलनंतर रोहित शर्मा आणि विराट कोहली पहिल्यांदाच मैदानात उतरत आहेत, पण आता रोहित शर्मा टीमचा कर्णधार नसेल. शुभमन गिलच्या नेतृत्वात भारतीय टीम खेळणार आहे. सीरिजचा पहिला सामना 19 ऑक्टोबरला खेळवला जाणार आहे.