GST 2.0 चा असाही फटका, लोकांनी कार लोन रद्द करण्याचा लावला धडाका, बँका हैराण

जर कार डीलरने पावती तयार केली असेल तर जुने दर लागू होतील. पण, जर अद्याप बिल तयार केले नसेल, तर ग्राहक २२ सप्टेंबरपासून कमी केलेल्या कराचा फायदा घेऊ शकतात. यामुळेच सध्या वाहनांच्या विक्रीत मंदी आहे. श्राद्ध पक्षामुळे ग्राहक खरेदी पुढे ढकलत आहेत. बरेच लोक आता नियोजित मॉडेलऐवजी चांगली आवृत्ती खरेदी करण्याचा विचार करत आहेत, कारण त्यांना नवीन दरांमुळे १० टक्क्यांपर्यंतचा फायदा मिळू शकतो.

आता जीएसटी दर कपातीसह सेस सुद्धा रद्द होणार आहे. त्यामुळे  सुमारे २,५०० कोटी रुपयांचा सेस ऑटो कंपन्यांच्या बुक्समध्ये अडकून राहील. सध्या, कारवरील एकूण कर २९% ते ५०% पर्यंत आहे, जो इंजिन क्षमता आणि लांबीवर अवलंबून असतो. परंतु, नवीन दरांनंतर, १,२०० सीसी पर्यंतच्या पेट्रोल वाहनांवर आणि १,५०० सीसी पर्यंतच्या डिझेल वाहनांवर फक्त १८% जीएसटी आकारला जाईल. मोठ्या इंजिन आणि एसयूव्हीवर ४०% पर्यंत जीएसटी सुरू राहील. याचा सर्वात जास्त फायदा लहान आणि मध्यम श्रेणीच्या कार खरेदीदारांना होईल.