इच्छा नसताना कोरोनाकाळात सोडलं पुणे, पण अमरावतीमध्ये वाजवला डंका, मैथिलीनं विद्यापीठात मिळवले 2 gold medal

न्यूज18 लोकलसोबत बोलताना तिने सांगितले की, तिचे पदवीचे शिक्षण हे पुण्यातील फर्ग्युसन महाविद्यालयात झाले. यानंतर तिला पुढचे शिक्षण हे तिथेच करायचे होते. मात्र, 2021 कोरोनाकाळात तिला पुणे शहर सोडावे लागले आणि अमरावतीला परत यावे लागले. त्यामुळे ती निराश झाली होती. यावेळी तिच्या आईवडिलांनी तिला प्रेरणा दिली की तुथे इथे चांगल्या पद्धतीने अभ्यास करुन टॉपर येऊन दाखव. त्यामुळे मग आई वडिलांनी दिलेले आव्हान तिने स्विकारले आणि शेवटी एमए इंग्रजी (साहित्य) या विषयात संत गाडगेबाबा अमरावती विद्यापीठ, अमरावती येथे दोन सुवर्णपदके मिळवून दाखवले.

परीक्षेच्या तयारीबाबत बोलताना ती म्हणाली की, मी वाचन केल्यानंतर व्यवस्थित प्रकारे नोट्स काढल्या. यासोबतच आणखी एक महत्त्वाचं म्हणजे परीक्षेच्या दोन महिन्यांपूर्वीच मी मोबाईल सोडला. म्हणजे परीक्षेच्या दोन महिने आधी कोणत्याच सोशल मीडियाचा वापर बंद केला आणि हा नियम मी एमएच्या चारही सेमेस्टरमध्ये फॉलो केला. तसेच तिने सांगितले की, चौथ्या सेमेस्टरदरम्यान तिला मायग्रेनचा त्रासही झाला. पण तिने त्या त्रासातही अभ्यासाठी कोणत्याही प्रकारे तडजोड न करता मन लावून प्रामाणिकपणे अभ्यास केला. याचेच फळ म्हणजे अमरावती विद्यापीठात प्रथम येत आज दोन सुवर्णपदके मिळवली.

सध्या ती सेट आणि नेट परीक्षेची तयारी करत असून तिला भविष्यात प्राध्यापक व्हायचे असल्याचे तिचे स्वप्न आहे. यासोबतच कायदा विषयातही तिची रुची असून ती भविष्यात लॉ मध्ये शिक्षण घेणार असल्याचे म्हणाली. मैथिली फुले हिचे वडील डॉ. किशोर फुले हे निवृत्त प्राध्यापक आहेत. तसेच अमरावती विद्यापीठाचे माजी जनसंपर्क अधिकारी आहेत. तिच्या या यशात तिच्या आईवडिलांचा मोठा सहभाग असल्याचे तिने यावेळी न्यूज18 लोकलसोबत बोलताना सांगितले.