क्लार्क व्हायला गेला अन् बँक मॅनेजर झाला, कोरोनात नोकरी गमावलेल्या शेतकरी पुत्राची संघर्षगाथा, Video

जालना: इंजीनियरिंगचा अभ्यास कठीण वाटत असल्याने तब्बल तीन वेळा इंजीनियरिंग सोडली. त्यानंतर वडिलांच्या आग्रहाखातर इंजीनियरिंग पूर्ण केली. जालन्यातील एका कंपनीत कॉन्ट्रॅक्ट बेसेस वर नोकरी देखील मिळवली. मात्र कोरोना आला आणि हातचं सगळं हिरावून घेतलं. हाती असलेली नोकरी गेल्यानंतरही निराश न होता जालना जिल्ह्यातील मानेगावच्या विनोद ढेंगळे यांनी सातत्याने अभ्यास सुरू ठेवला आणि नुकत्याच झालेल्या आयबीपीएस परीक्षेत उत्तुंग यश मिळवले आहे. महाराष्ट्र ग्रामीण बँकेच्या मॅनेजर पदाला त्यांनी गवसणी घातलीय.

छत्रपती संभाजीनगर येथील एमआयटी कॉलेजमध्ये इंजीनियरिंग अभ्यासक्रम पूर्ण केल्यानंतर त्यांनी जालन्यातील एका कंपनीत जॉब मिळवला. मात्र कोरोना आला आणि त्यानंतर त्यांचा जॉब गेला. मात्र हार न मानता त्याने मित्रांच्या सल्लामसलती नंतर बँकिंग परीक्षांची तयारी सुरू केली. सुरुवातीला क्लर्क पदासाठी तयारी करणाऱ्या विनोदचा हळूहळू आत्मविश्वास वाढत गेला आणि नुकत्याच लागलेल्या परीक्षेच्या निकालात त्याची विदर्भ कोकण ग्रामीण बँकेच्या मॅनेजर पदी नियुक्ती झाली आहे. विनोदने मिळवलेल्या यशाने त्याची आई वडील अतिशय आनंदी आहेत.