Recruitment: सरकारी नोकरीची सुवर्णसंधी, KDMC मध्ये 30 वर्षानंतर मेगाभरती, पाहा संपूर्ण माहिती

नव्या आकृती बंधानुसार 2021 मध्ये 757 जागांच्या भरतीस मंजुरी देण्यात आली होती. मात्र, गेल्या 4 वर्षांत 300 हून अधिक कर्मचारी निवृत्त झाले आहे. त्यामुळे आता विविध पदांसाठी 1076 जागांवर भरती प्रक्रिया राबवण्याचा निर्णय घेण्यात आला आहे. विशेष म्हणजे सन 1995 नंतर होणारी ही पहिलीच मेगाभरती असून टीसीएस कंपनीच्या माध्यमातून ही भरती प्रक्रिया राबण्यात येईल. याबाबत पालिका आयुक्त अभिनव गोयल यांनी नुकतीच आढावा बैठक घेतली.

कल्याण डोंबिवली महापालिकेत 1995 मध्ये शेवटची नोकरभरती करण्यात आली होती. यानंतर पालिकेत काही जागांवर अनुकंपा तत्त्वावर कर्मचाऱ्यांना नियुक्ती देण्यात आली. तर आकृतीबंध मंजूर झाल्यानतंर अनेक वर्षांपासून पालिकेत काम करणाऱ्यांना पदोन्नती देत काही रिक्त जागा भरण्यात आल्या. मात्र, तरीही पालिकेत कर्मचाऱ्यांच्या अनेक जागा रिक्त आहेत. तांत्रिक कर्मचाऱ्यांपासून आरोग्य विभागातील डॉक्टर, तृतीय आणि चतुर्थ श्रेणीतील कर्मचारी, लिपीक आदी पदांच्या निम्म्याहून अधिक पदांवर कर्मचारीच नाहीत. त्यामुळे प्रशासनाचा गाडा हाकताना दमछाक होत असून नोकरभरतीची मागणी होत होती.

दरम्यान, शासकीय नोकरीच्या प्रतीक्षेत असणाऱ्या अनेक उमेदावरांसाठी  ही एक सुवर्णसंधी असणार आहे. याबाबत लवकरच जाहिरात प्रसिद्ध होणार असून टीसीएस मार्फत पारदर्शीपणे भरती होणार असल्याचं सांगितलं जातंय. भरतीची माहिती, उपलब्ध जागा, ऑनलाईन अर्ज याबाबत माहिती पालिकेच्या अधिकृत संकेतस्थळावर उपलब्ध केली जाणार आहे. तर अनेक दिवसांपासून भरती न झाल्याने घोडबाजार रंगण्याची भीती देखील व्यक्त होतेय.