Pink e-Rickshaw: पिंक ई-रिक्षा योजना नेमकी काय? कसा होणार महिलांना फायदा, संपूर्ण माहिती

पुणे : गरजू महिलांना रोजगाराची संधी उपलब्ध करून देण्यासाठी गुलाबी (पिंक) रिक्षा खरेदी करण्यास अर्थसाहाय्य देण्याचा निर्णय पुणे महापालिकेने घेतला आहे. राज्य सरकारने नुकतीच 'पिंक ई-रिक्षा' ही योजना राज्यात लागू केली आहे. त्याची अंमलबजावणी पालिकेकडून केली जाणार आहे. रिक्षासाठी कर्जाचा व्याजदर देखील कमी असून महिलांनी 5 वर्षांमध्ये महिन्याला 6 हजार रुपयांचा हप्ता भरून याची परतफेड करायची आहे. पिंक ई-रिक्षा योजनेमुळे गरजू महिलांना रोजगाराची संधी उपलब्ध होणार आहे.

महाराष्ट्र शासनाने पिंक ई-रिक्षा योजना ही विशेष महिलांसाठी लागू केली आहे. यामध्ये पुणे महापालिका शहरासाठी काम करत आहे. यासोबत महिला बालकल्याण, आयसीडीसी प्रोजेक्ट महाराष्ट्र शासन आणि पुणे महानगर पालिका हे एकत्रित पणे काम करत आहेत. या योजनेमध्ये लाभार्थीचा एक हिस्सा राज्य शासनाचे अनुदान आणि बँकांचे कर्ज या तिन्हींचा समन्वय करून ही योजना राबवली जात आहे.

या रिक्षांची नोंदणी आणि विमा वितरकांकडून मोफत काढला जाणार आहे. तसेच संबंधित लाभार्थी महिलांना ही रिक्षा चालविण्यासाठीचे प्रशिक्षण आणि वाहन परवानादेखील या वितरकांमार्फत मोफत उपलब्ध करून देण्यात येणार आहे. महापालिकेच्या क्षेत्रीय कार्यालयांमधील समाज विकास विभागाच्या कार्यालयात या योजनेची माहिती मिळणार असल्याचे महापालिकेच्या समाज विकास विभागाचे उपायुक्त नितीन उदास यांनी सांगितले.