Pune Job Fair 2026: पुण्यात नोकरी शोधताय? 1900 पदांसाठी थेट मुलाखतीतून भरती, कधी आणि कुठं? संपूर्ण माहिती
- Reported by:Pooja Satyavan Patil
- Published by:Shankar Pawar
Last Updated:
Pune Job Fair 2026: 1900 पेक्षा जास्त रिक्त पदे भरली जाणार आहेत. ही पदे 10 वी, 12 वी, डिप्लोमा तसेच पदवीधर पात्रता असलेल्या उमेदवारांसाठी उपलब्ध आहेत.
पुणे: नोकरीच्या शोधात असलेल्या तरुणांसाठी पुण्यात मोठी संधी उपलब्ध होणार आहे. जिल्हा कौशल्य विकास, रोजगार व उद्योजकता मार्गदर्शन केंद्र आणि एशियन कॉलेज ऑफ सायन्स अॅण्ड कॉमर्स, पुणे यांच्या संयुक्त विद्यमाने पंडित दीनदयाल उपाध्याय रोजगार मेळाव्याचे आयोजन करण्यात आले आहे. हा रोजगार मेळावा 17 मार्चला सकाळी 10 वाजता नऱ्हे–धायरी रोडवरील पारी कंपनी चौक येथील एशियन कॉलेज ऑफ सायन्स अॅण्ड कॉमर्स येथे होणार आहे
मेळाव्यात 24 कंपन्यांचा सहभाग
या रोजगार मेळाव्यात तरुणांसाठी नोकरीच्या अनेक संधी उपलब्ध होणार आहेत. जिल्ह्यातील औद्योगिक परिसरातील सुमारे 24 कंपन्यांनी या मेळाव्यात सहभाग नोंदवला आहे. या कंपन्यांकडून जवळपास 1900 पेक्षा जास्त रिक्त पदे भरली जाणार आहेत. ही पदे 10 वी, 12 वी, डिप्लोमा तसेच पदवीधर पात्रता असलेल्या उमेदवारांसाठी उपलब्ध आहेत.
advertisement
पुणे जिल्ह्यातील नोकरीच्या शोधात असलेल्या युवकांना या मेळाव्याच्या माध्यमातून विविध क्षेत्रातील रोजगाराच्या संधी मिळणार आहेत. जास्तीत जास्त बेरोजगार आणि नोकरी इच्छुक उमेदवारांनी या रोजगार मेळाव्यात सहभागी व्हावे, असे आवाहन आयोजकांच्या वतीने करण्यात आले आहे.
इच्छुक उमेदवारांनी रिक्त पदांबाबत अधिक माहिती आणि अर्ज करण्यासाठी www.rojgar.mahaswayam.gov.in या वेबसाईटला भेट द्यावी. खाजगी क्षेत्रातील विविध पदांसाठी या मेळाव्यात प्रत्यक्ष मुलाखती घेतल्या जाणार आहेत. त्यामुळे जास्तीत जास्त नोकरी इच्छुकांनी रोजगार मेळाव्याच्या ठिकाणी उपस्थित राहून या संधीचा लाभ घ्यावा, असे आवाहन करण्यात आले आहे.
advertisement
मुलाखतीस येताना उमेदवारांनी आपल्या शैक्षणिक कागदपत्रांच्या छायांकित प्रती तसेच आवश्यक अर्ज सोबत आणावेत. अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, पुणे (रास्ता पेठ) येथे प्रत्यक्ष भेट देऊन किंवा 020-26133606 या दूरध्वनी क्रमांकावर संपर्क साधावा, अशी माहिती संबंधित कार्यालयाकडून देण्यात आली आहे.
Location :
Pune,Maharashtra
First Published :
Mar 14, 2026 12:47 PM IST
मराठी बातम्या/करिअर/
Pune Job Fair 2026: पुण्यात नोकरी शोधताय? 1900 पदांसाठी थेट मुलाखतीतून भरती, कधी आणि कुठं? संपूर्ण माहिती
