सांगलीचा पैलवान गाजवतोय मार्केटचं मैदान! खास थंडाईला दुबईतून मागणी

सांगली: महाराष्ट्राला कुस्तीची बरीचं मोठी परंपरा लाभली आहे. अनेक आंतरराष्ट्रीय मल्ल या मातीत घडले आहेत. याच कुस्ती परंपरेचा पाईक, महाबली केसरी सांगलीचा मल्ल आता मार्केटच्या आखाड्यात उतरला आहे. लाल मातीशी जोडून ठेवणारा व्यवसाय त्यानं सुरू केलाय. विशेष म्हणजे या व्यवसायाची ख्याती आता महाराष्ट्र आणि कर्नाटक सोबतच अगदी दुबईतही पोहोचलीये. पैलवान संग्रामसिंह जाधव यांच्या याच व्यवसायाबात आपण माहिती घेणार आहोत.

एखादा तगडा मल्ल घडायचा असेल तर त्याला कसरतीसोबतच खुराकही चांगला असावा लागतो. पैलवानांच्या खुराकात त्यामुळेच थंडाई महत्त्वाची मानली जाते. इस्लामपूरचे मल्ल संग्रामसिंह जाधव यांनी हीच आरोग्यदायी थंडाई सर्वांना उपलब्ध करून देण्याचा निर्णय घेतला. याबाबत ते सांगतात की, "कोरोना काळात कुस्तीची मैदानी बंद होती. तेव्हा उत्पन्नाचा मार्ग म्हणून मी व्यवसायाच्या आयडिया शोधत होतो. यातूनच मला कुस्तीची नाळ जोडून ठेवणारी एक कल्पना सुचली. ती म्हणजे 'थंडाई' विक्रीचा व्यवसाय होय."