महिलांनो, सावधान! साताऱ्यात 'सोन्याची वीट' देणारी टोळी सक्रिय, तुमची 'ही' चूक पडेल महागात

पूर्वी ‘पोलीस आहोत’ असे सांगून किंवा ‘पुढे खून झाला आहे’ असे भासवून महिलांना लुटले जात होते. मात्र, महिला आता सतर्क झाल्याने चोरट्यांनी बोलण्याचा हा नवा फंडा सुरू केला आहे. साधी राहणीमान असल्यामुळे लवकर विश्वास बसेल या हेतूने चोरटे लेंगा, टोपी आणि साधा शर्ट घालून गर्दीच्या ठिकाणी फिरत आहेत.

साताऱ्यात पहिल्यांदाच अशा प्रकारची टोळी सक्रिय झाली आहे. पोलीस या टोळीचा शोध घेत असून, फसवणुकीचे प्रकार टाळण्यासाठी गर्दीच्या ठिकाणी साध्या वेशातील पोलिसांची पथके गस्त घालणार आहेत. पोलीस निरीक्षक अरुण देवकर म्हणाले, “महिलांना फसवणारे हे सराईत गुन्हेगार आहेत. त्यांचा वेश काहीही असला तरी ते पोलिसांच्या तावडीतून सुटणार नाहीत, लवकरच त्यांना अटक केली जाईल.”

पोलिसांनी महिलांना आवाहन केले आहे की, अनोळखी व्यक्तींनी रस्त्यात बोलण्याचा प्रयत्न केल्यास त्यांच्याकडे दुर्लक्ष करा. अशा व्यक्तींवर संशय आल्यास तातडीने पोलिसांशी संपर्क साधा.