कोल्हापुरात चोरट्यांचं खतरनाक धाडस! भरदुपारी-भरवस्तीत फोडलं घर, चोरी 'इतकी' मोठी की, पोलिसांचीही उडाली झोप!

शाहूपुरी पोलिसांनी दिलेल्या माहितीनुसार, डॉ. अनिता परितेकर या सीपीआरमध्ये मेडिसिन विभागाच्या प्रमुख आहेत, तर त्यांचे पती महापालिकेत अधिकारी आहेत. त्यांचा मुलगा महाविद्यालयीन शिक्षण घेत आहे. सोमवारी सकाळी परितेकर दाम्पत्य कामासाठी घराबाहेर पडले. त्यानंतर, 11 वाजता त्यांचा मुलगाही क्लासला गेला. दुपारी अडीचच्या सुमारास स्वयंपाकीण घरी आल्यावर त्यांना घराचा कडी-कोयंडा उचकटलेला दिसला आणि घरात चोरी झाल्याचे लक्षात आले. त्यांनी तात्काळ फोन करून याची माहिती डॉ. परितेकर यांना दिली.

घरी पोहोचल्यावर डॉ. परितेकर यांनी पाहिले असता, बेडरूममधील लाकडी कपाटातील तीन मंगळसूत्रे, कर्णफुले, सोन्याची साखळी, अंगठ्या, तोडे, ब्रेसलेट आणि हिऱ्यांचे टॉप्स असे एकूण 50 तोळ्यांचे दागिने चोरीला गेल्याचे त्यांच्या लक्षात आले. बाजारभावानुसार या दागिन्यांची किंमत सुमारे 55 लाख रुपये आहे.

डॉ. परितेकर यांच्या मुलीचे लग्न झाले आहे, पण त्यांनी मुलगा आणि नातीच्या लग्नासाठी हे दागिने मोठ्या प्रेमाने जपून ठेवले होते. त्यावरच चोरट्यांनी हात साफ केल्याने परितेकर कुटुंबाला मोठा धक्का बसला आहे. घटनेची माहिती मिळाल्यानंतर शाहूपुरी पोलिसांनी तात्काळ घटनास्थळी येऊन पंचनामा केला. ठसेतज्ज्ञ आणि श्वानपथकाने तपास करण्याचा प्रयत्न केला, पण त्यात यश आले नाही. पोलिसांनी फिर्याद घेऊन चोरट्यांचा शोध सुरू केला आहे, पण अद्याप कोणताही सुगावा लागलेला नाही.