dawood ibrahim : कोकणात जन्मलेल्या दाऊदने किती लग्नं केली, किती आहे मुलं आणि ती सद्धा काय करताय?

26 डिसेंबर 1955 रोजी महाराष्ट्रातील रत्नागिरी जिल्ह्यात दाऊद इब्राहिम कासकरचा जन्म झाला. त्याचे वडील इब्राहिम कासकर हे पोलीस हवालदार होते. त्याचं कुटुंब मुंबईतील डोंगरी भागात स्थायिक झालं. 70च्या दशकात मुंबईतील अंडरवर्ल्डमध्ये दाऊदने आपली दहशत निर्माण केली होती. पूर्वी तो हाजी मस्तान गँगमध्ये काम करायचा. पुढे त्याचा प्रभाव वाढत गेला. लोक त्याच्या टोळीला 'डी-कंपनी' म्हणायचे. मुंबईत 1993 मध्ये झालेल्या सीरिअल बॉम्बस्फोटांचा तो मास्टरमाईंड होता. स्फोट घडवून आणल्यानंतर तो भारत सोडून दुबईला पळून गेला आणि नंतर पाकिस्तानात आपला तळ ठोकला. सध्या तो आपल्या कुटुंबासह तिथे राहतो. त्याच्यावर भारतात दहशतवादी हल्ला, खून, अपहरण, कॉन्ट्रॅक्ट किलिंग, संघटित गुन्हेगारी, ड्रग्ज, शस्त्रास्त्रांची तस्करी असे अनेक गुन्हे दाखल आहेत. 2003 मध्ये त्याला जागतिक दहशतवादी घोषित करण्यात आलं आहे. 2011 मध्ये, एफबीआय आणि फोर्ब्सच्या यादीत त्याला जगातील तिसरा सर्वात वाँटेड फरार गुन्हेगार म्हटलं होतं.

कराचीतील क्लिफ्टन रोडवर असलेला 'व्हाईट हाउस बंगला' हे दाऊदचं पाकिस्तानातील कायमचं निवासस्थान आहे. तो आपल्या संपूर्ण कुटुंबासह तिथे राहतो. या शिवाय कराचीमध्येच डिफेन्स हाउसिंग कॉलनीमध्ये त्याचा एक बंगला (बंगला क्रमांक-37) आहे. नवीन खुलाशानुसार, दाऊद आता कराचीतील डिफेन्स एरियातील अब्दुल्ला गाझी बाबा दर्ग्याच्या मागे रहिम फाकीजवळ राहतो. ज्या रस्त्यावर त्याचा बंगला आहे तो कराचीतील नो-ट्रेसपास झोन आहे आणि तिथे पाकिस्तानी रेंजर्सचा कडक पहारा आहे. दाऊदला आयएसआयकडून संरक्षण मिळत आहे. दाऊदशी संबंधित सर्व पुरावे पाकिस्तानला देण्यात आल्याचं भारत सरकारचं म्हणणं आहे. पण, हे पुरावे खोटे असल्याचा सूर पाकिस्तान सातत्याने लावत आहे. दाऊद पाकिस्तानात नाही, असा पाकिस्तानचा दावा होता. नंतर पाकिस्तानने दाऊदचं कराचीतील वास्तव्य मान्य केलं. मात्र, कारवाईच्या नावाखाली संपूर्ण जगाची दिशाभूल केली जात आहे.

दाऊदकडे एकूण 14 पासपोर्ट असल्याचा दावा भारतीय तपास यंत्रणांनी केला आहे. दाऊद आपली पत्नी आणि चार मुलांसह कराचीमध्ये राहतो. तो वारंवार दुबईला जात असल्याचं कागदपत्रांवरून स्पष्ट झालं आहे. गुप्तचर यंत्रणांना दाऊद इब्राहिमची पत्नी झुबिना झरिन उर्फ मेहजबीन हिच्या नावे टेलिफोन बिल आणि दाऊदचे अनेक पासपोर्टही सापडले आहेत. काही माध्यम संस्थाकडे भारताना दाऊदविरुद्ध तयार केलेल्या गुन्हेगारी रेकॉर्ड फाइलची (डॉसियर) प्रत देखील आहे. एनएसए स्तरावरील चर्चेत हे डॉसियर पाकिस्तानकडे सुपूर्द करण्यात आलं आहे. यामध्ये दाऊदच्या नऊ ठिकाणांचा उल्लेख आहे. ही सर्व ठिकाणं पाकिस्तानमधील आहेत. यातील बहुतांश पत्ते कराचीतील आहेत. आश्चर्याची बाब म्हणजे पाकिस्तानची राजधानी इस्लामाबादमध्येही दाऊदची मालमत्ता आहे.

दाऊदने पाकिस्तानी पठाण मुलीशी दुसरं लग्न केलं आहे. दाऊदची पहिली पत्नी मेहजबीन हिनेही याला दुजोरा दिला होता. दाऊदची पहिली पत्नी मेहजबीन प्रत्येक महत्त्वाच्या प्रसंगी व्हॉट्सअॅप कॉलद्वारे भारतातील नातेवाईकांच्या संपर्कात असते. मेहजबीन ही मुंबईची आहे. मेहजबीन आणि दाऊदचा घटस्फोट झालेला नाही. त्याने तिच्या संमतीने दुसरं लग्न केल्याचं म्हटलं जातं.

मुंबई बॉम्बस्फोटानंतर अनीस इब्राहिम आणि नूरा इब्राहिम हे दोन भाऊ दाऊदसोबत दुबईला पळून गेले होते. 2007 मध्ये कराची बॉम्बस्फोटात नूराचा मृत्यू झाला. अनीस दाऊदसोबत राहतो. तिसरा भाऊ इक्बाल कुटुंबासह मुंबईत राहतो. हसीना पारकर आणि सईदा या दोन बहिणी मुंबईत राहत होत्या. मात्र, आता दोघींचाही मृत्यू झाला आहे. फरजाना तुंगेकर हिचा देखील मृत्यू झाला आहे. दाऊदची पत्नी मेहजबीन आपला दीर अनीससोबत मिळून दाऊदचं गुन्हेगारी साम्राज्य सांभाळत असल्याचं माध्यमांनी म्हटलं आहे.

- दाऊद इब्राहिमवर 1993मधील मुंबई बॉम्बस्फोटांव्यतिरिक्त, 26/11चा मुंबईवरील दहशतवादी हल्ला घडवून आणणं, बंदी घातलेली दहशतवादी संघटना अल कायदाचा म्होरक्या ओसामा बिन लादेन आणि अयमान अल-जवाहिरी यांच्याशी जवळचे संबंध, 2G स्पेक्ट्रम घोटाळा आणि आयपीएल स्पॉट फिक्सिंगचे आरोप आहेत. संयुक्त राष्ट्र सुरक्षा परिषदेच्या आयएस आणि अल-कायदा प्रतिबंध समितीने दाऊदला जागतिक दहशतवादी घोषित केलं आहे.