वर्गमित्राला Reels बववण्यासाठी हवी होती साडी; पण मैत्रिणीला गमवावा लागला जीव, कोल्हापूरात घडला भयंकर अपघात!

पोलिसांकडून मिळालेल्या माहितीनुसार श्रेया महेश देवळे (वय-19, मूळ गाव उंब्रज, ता. कराड, जि. सातारा) सध्या शिक्षणानिमित्त कोल्हापूरातील कळंबा रिंगरोड येथील साळोखेनगरात मैत्रिणींसोबत राहत होती. ती इंजिनिअरिंगच्या तिसऱ्या वर्गात शिकत होती. बुधवारी दुपारी तिचा वर्गमित्र ओम संदीप पाटील (वय-19, रा. प्रथमेशनगर कळंबा, रिंगरोड कोल्हापूर) श्रेयाकडे आला. त्याला रील बनवण्यासाठी साडी हवी होती.

ओम आणि श्रेया रात्री नऊच्या सुमारास दुचाकीवरून गंगावेश येथे गेला. दोघेही मामाच्या घरून साडी घेऊन सोन्या मारूती चौकातील भगतसिंग तरुण मंडळाजवळ आले. रात्री साडेदहाच्या सुमारास सिमेंट काॅंक्रीट मिक्सर ट्रकचालकाने दोघांना ओव्हरटेक केलं आणि अचानक डावीकडे टर्न घेतला. त्यामुळे ट्रकटे पाठीमागचे चाक दुचाकीला धडकले आणि दोघेही रस्त्यावर पडले. श्रेया दुचाकीच्या मागे बसली होती. तिला गंभीर दुखापत झाली. दरम्यान ट्रकचालकाने धूम ठोकली. आजुबाजुच्या लोकांनी सीपीआरमध्ये दाखल केले. पण उपचार सुरू असताना श्रेयाचा मृत्यू झाला.