लातूर हादरलं: पत्नीला पळवून नेल्याने पतीची सटकली, काकाच्या कृत्याची दिली पुतण्याला शिक्षा, आधी अपहरण केलं मग...

मिळालेल्या माहितीनुसार, सुरेश बंडगर (रा. कासारसिरसी, ता. निलंगा) हे २१ जुलै रोजी पत्नी सविता बंडगर (वय ३९) यांच्यासह उमरगा बसस्थानकात गेले होते. ते दोघंही गावी जाण्यासाठी बसची वाट पाहत होते. तेवढ्यात लघुशंकेच्या बहाण्याने सविता बाथरुमच्या दिशेनं गेल्या आणि त्या परत आल्याच नाहीत. हा प्रकार घडल्यानंतर सुरेश यांनी उमरगा पोलिसांत पत्नी बेपत्ता झाल्याची तक्रार दाखल केली. गावातील रोहित सूर्यवंशी यानेच आपल्या पत्नीचे अपहरण केल्याचा संशय सुरेश यांना होता. तसं त्यांनी तक्रारीत देखील म्हटलं होतं. महिनाभरानंतरही पत्नीचा शोध न लागल्याने संतप्त झालेल्या सुरेशने सूड घेण्याचा निर्णय घेतला.

गुरुवारी (१४ ऑगस्ट) सकाळी ९ वाजता सुरेशने रोहितचा १४ वर्षीय पुतण्या कृष्णा सूर्यवंशी याचे निलंगा येथील कासारसिरसी येथील करीबस्वेश्वर विद्यालयासमोरून पांढऱ्या रंगाच्या कारमधून अपहरण केले. या कृत्यासाठी त्याने आपली दोन मुले अभिषेक आणि अजय यांची मदत घेतली. या घटनेची माहिती मिळताच कृष्णाच्या नातेवाईकांनी पोलिसांत तक्रार दाखल केली. कासारसिरसी पोलिसांनी तातडीने गुन्हा दाखल करत पुढील तपास सुरू केला आहे.