त्याच्या तीन बायका, तिचे दोन नवरे, दोघांचं सूत जुळलं अन्.., लिव्ह इन पार्टनरला पाठलाग करून संपवलं

वनजाक्षी असं हत्या झालेल्या ३५ वर्षीय महिलेचं नाव आहे. तर विठ्ठल असं आरोपीचं नाव आहे. आरोपी विठ्ठल हा कॅब ड्रायव्हर आहे. तो मागील चार वर्षांपासून वनजाक्षीसोबत लिव्ह इन रिलेशनशिपमध्ये राहत होता. आरोपी विठ्ठल याने यापूर्वी तीन विवाह केले होते. तर वनजाक्षी हिनेही दोनदा लग्न केलं होतं. यानंतर दोघंही लिव्ह रिलेशनशिपमध्ये राहत होते. पण विठ्ठल याला दारुचं व्यसन होतं. तो दारुच्या नशेत अनेकदा वनजाक्षीला मारहाण करत असायचा. यामुळे मागील काही दिवसां पासून दोघांमध्ये वाद सुरू होता.

दारु पिऊन विठ्ठल वारंवार छळ करतो. मारझोड करतो, यामुळे वनजाक्षी विठ्ठलपासून दूर गेली होती. ती कर्नाटक रक्षण वेदिकेचा सदस्य असलेल्या मरियाप्पा या दुसऱ्या पुरूषाच्या संपर्कात आली होती. दोघांमध्ये प्रेमसंबंध सुरू होते. घटनेच्या दिवशी वनजाक्षी आपला प्रियकर मरियाप्पा आणि चालकासह मंदिरातून परत येत होती. यावेळी आरोपी विठ्ठल त्यांच्या कारचा पाठलाग करत होता.

ज्यावेळी वनजाक्षीची कार ट्रॅफिक सिग्नलवर थांबली. तेव्हा आरोपीने त्यांची अडवली आणि खिडकीतून आतमध्ये पेट्रोल ओतले. वनजाक्षी, मरियाप्पा आणि ड्रायव्हर तिघांवरही त्याने पेट्रोल ओतले. पण मरियाप्पा आणि चालक पळून जाण्यात यशस्वी झाले, तर विठ्ठलने वनजाक्षीचा पाठलाग केला, तिच्यावर अधिक पेट्रोल ओतले आणि लाईटरने तिला पेटवून दिले. ही घटना बंगळुरूमध्ये घडली.

तेथून जाणाऱ्या एका हा प्रकार पाहिल्यानंतर तो पीडितेच्या बचावासाठी धावला. त्याने आग विझवण्यासाठी कापडाचा तुकडा वापरला आणि इतरांच्या मदतीने तिला एका खाजगी रुग्णालयात उपचारासाठी दाखल केलं. या प्रक्रियेत, तो देखील किरकोळ भाजला. वनजाक्षी ६० टक्के भाजली होती, उपचारादरम्यान तिचा रुग्णालयात मृत्यू झाला. हा कांड उघडकीस येताच पोलिसांनी विठ्ठल याला अवघ्या २४ तासांत अटक केली. घटनेचा पुढील तपास केला जात आहे.