टीप मिळाली अन् पोलिसांची सिनेस्टाईल छापेमारी, जळगावात लॉजमध्ये सुरू होता भलताच प्रकार

मिळालेल्या माहितीनुसार, भडगाव रस्त्यावरील विनायक प्लाझा हॉटेल व रेसिडेन्सी या लॉजमध्ये सुरू वेश्याव्यवसाय सुरू असल्याची गुप्त माहिती चाळीसगाव पोलिसांना मिळाली होती. या माहितीच्या आधारे पोलिसांनी बनावट ग्राहक पाठवून सिनेस्टाईलरीत्या छापेमारी करत वेश्याव्यवसायाचा पर्दाफाश केला.

दिनांक ३ जुलै २०२५ रोजी दुपारी पोलीस निरीक्षक अमितकुमार मनेळ यांना उपविभागीय पोलीस अधिकारी विनायक कोते यांच्याकडून माहिती मिळाली होती की, भडगाव रोडवरील विनायक प्लाझा लॉजमध्ये महिलांच्या मदतीने अनैतिक व्यवसाय सुरू आहे. त्यानुसार पोलिसांनी बनावट ग्राहकांमार्फत सापळा रचला. बनावट गग्राहकांना अनुक्रमे १५००/- रुपयांच्या नोटांसह पाठविण्यात आले. त्यांनी आत जाऊन कळवले की, महिलांसह सौदा निश्चित करण्यात आला आहे. पोलिसांनी तत्काळ धाड टाकत रुम नं. १०६ आणि रुम नं. २०८ मध्ये महिला बनावट ग्राहकांसोबत आढळून आल्या. पोलिसांनी महिलांकडून २३,०१०/- किंमतीचा मुद्देमाल आणि मोबाइल, कंडोमचे बॉक्स जप्त केले.

लॉजच्या काउंटरवर बसलेला व्यवस्थापक प्रसाद राजेंद्र गवळी (वय २१) याच्याकडून बनावट ग्राहकांनी दिलेल्या पाचशेच्या नोटा आणि मोबाईल फोन हस्तगत करण्यात आले. लॉजचे मालक मनोज छगन गवळी (रा. फुले कॉलनी, चाळीसगाव) हे असल्याचे समोर आले आहे. या कारवाईत पोलिसांनी रोख रक्कम : ₹२३,०१०/-, मोबाईल फोन : ३ (Oppo, Vivo व OnePlus), कंडोमचे बॉक्स असा मुद्देमाल जप्त केला आहे. त्यानंतर तीनही आरोपी व पीडित महिलेला पोलिसांनी ताब्यात घेतले. पीडित महिलेला धुळे महिला सुधार गृहात रवाना करण्यात आले आहे. तर याप्रकरणी आरोपींवर अनैतिक मानवी व्यापार प्रतिबंधक कायदा १९५६ अंतर्गत कलम ३, ४, ५, ७ व ८ अन्वये गुन्हा दाखल करण्यात आला आहे.