Solapur: इन्स्टावर स्टोरी ठेवली अन् थेट पोलिसांनाच दिलं आव्हान, सोलापुरात धुमाकूळ घालणाऱ्या दरोडेखोरांचा गेम ओव्हर!

सोलापूर- कोणताही आरोपी गुन्हा करून लपतो किंवा पळून जातो. रात्रीच्या वेळी महामार्गावर गाड्या अडवून लुटणाऱ्या दरोडेखोरांनी थेट पोलिसांनाच आव्हान दिले. पोलीस मागावर असल्याची माहिती मिळताच सोशल मीडियावर "मला पकडून दाखवा" असे स्टेट्स ठेवून खुले चॅलेंज दिले. सोलापूर पोलिसांनी देखील हे चॅलेंज स्वीकारून आरोपींना बेड्या ठोकल्या. चैतन्य ऊर्फ भैया पांडुरंग शेळके (वय 23 रा. भोत्रा, परांडा, धाराशिव), करण शिवाजी भोसले (वय 22 रा. खांडवी, बार्शी) व मारुती नागनाथ माने (रा. सुटका, भूम, धाराशिव) अशी तिघा आरोपींची नावे आहेत. त्यांच्याकडून 58 ग्रॅम सोन्याचे दागिने, दोन पिस्टल, तीन जिवंत काडतुसे, तीन वाहने असा एकूण 12 लाखांचा मुद्देमाल स्थानिक गुन्हे शाखेच्या पथकाने हस्तगत केला आहे.