पोस्टरमधल्या मराठी अभिनेत्याला ओळखलं का? महात्मा गांधींची भूमिका साकारून मिळवली लोकप्रियता

'चिमणराव', 'श्रीयुत गंगाधर टिपरे', 'चिंची चेटकीण', 'चौकट राजा', 'तात्या विंचू' यांसारख्या अनेक अविस्मरणीय भूमिकांना मालिका, रंगभूमी आणि चित्रपटाच्या पडद्यावर जिवंत करणारे नटश्रेष्ठ दिलीप प्रभावळकर वयाच्या या टप्प्यावर पुन्हा एकदा एका नव्या आणि महत्त्वपूर्ण भूमिकेतून रसिकांसमोर येणार आहेत. 'दशावतार' या कोकणच्या निसर्गरम्य पार्श्वभूमीवर आधारित भव्य सस्पेन्स थ्रिलर चित्रपटात ते दिसणार आहेत. आजवरच्या त्यांच्या भूमिकांपेक्षा ही भूमिका खूपच वेगळी असून, प्रेक्षकांना ते पुन्हा एकदा आश्चर्यचकित करणार आहेत, अशी खात्री निर्मात्यांनी दिली आहे.

झी स्टुडिओज् प्रस्तुत, ओशन फिल्म कंपनी आणि ओशन आर्ट हाऊस निर्मित 'दशावतार' हा चित्रपट केवळ कोकणातील अद्भुत निसर्गाचं आणि तिथल्या रूढीपरंपरा, मान्यता व लोककला यांचं मनोरम्य दर्शन घडवणार नाही, तर त्याला गूढ, उत्कंठावर्धक आणि वेगवान थरारकथेची जोडही आहे. कोकणात घडणाऱ्या एका रहस्यमय कथेभोवती या चित्रपटाची बांधणी करण्यात आली आहे, ज्यामुळे प्रेक्षकांना खिळवून ठेवण्यात तो यशस्वी होईल.

१२ सप्टेंबर रोजी 'दशावतार' हा चित्रपट रूपेरी पडद्यावर झळकणार आहे. या चित्रपटाची पहिली झलक लवकरच झी मराठी वाहिनीवर प्रेक्षकांना पाहायला मिळणार आहे. दिलीप प्रभावळकर यांच्या एका नव्या भूमिकेसाठी आणि कोकणच्या मातीतील या थरारक गाथेसाठी प्रेक्षक उत्सुक आहेत.