Salman Khan Birthday : 2000 कोटींचा मालक असलेल्या सलमानचा पहिला पगार माहितीये? हॉटेलमध्ये केलं होतं काम

सलमानने आपला अभिनय आणि प्रयत्नांच्या जोरावर अनेक चित्रपट मिळवले. त्याने आपल्या कारकिर्दीत मैंने प्यार किया, साजन, हम आपके हैं कौन, करण-अर्जुन, जुडवा, प्यार किया तो डरना क्या, तेरे नाम, दबंग, बॉडीगार्ड, एक था टायगर, बजरंगी भाईजान असे अनेक ब्लॉकबस्टर चित्रपट दिले आहेत. बॉक्स ऑफिसवर एकापाठोपाठ अनेक सुपरहिट चित्रपट देऊन सलमानने यशाचं शिखर गाठलं आहे.

हेही वाचा - शाहरुख की सलमान कोणाकडे आहे जास्त बँक बॅलन्स? अजय देवगणने स्पष्टच सांगून टाकलं

27 डिसेंबर 1965 रोजी जन्मलेल्या सलमानने कोट्यवधी चाहत्यांच्या मनात घर केलं आहे. सध्याच्या घडीला तो बॉलिवूडमधला सर्वांत महागडा आणि डिमांडिंग स्टार बनला आहे. तो कोट्यवधी रुपयांच्या संपत्तीचा मालक आहे. अभिनेता असण्यासोबतच तो एक बिझनेसमनदेखील आहे. त्याचं 'सलमान खान फिल्म्स (SKF)' नावाचं प्रॉडक्शन हाउस आहे. बीइंग ह्युमन नावाचा एक ब्रँडदेखील त्याने लाँच केला आहे. या सर्व गोष्टींमधून त्याची भरपूर कमाई होते. याशिवाय ब्रँड एंडॉर्समेंटमधूनही तो कोट्यवधी रुपयांची कमाई करतो.

सलमानने इंडस्ट्रीत अनेक ट्रेंड सेट केले आहेत. तो त्याच्या पिळदार शरीरयष्टीसाठी ओळखला जातो. त्याने बॉलिवूडमध्ये सिक्स पॅक अॅब्ज आणि शर्टलेस बॉडी फ्लाँट करण्याचा ट्रेंड सुरू केला. त्यातून त्याचे चाहते आणि अनेक बॉलिवूड कलाकारांनी प्रेरणा घेतली. सलमान खानने अनके नवोदितांना इंडस्ट्रीत संधी दिली आहे. त्यामुळे इंडस्ट्रीतले अनेक जण त्याला 'भाईजान' अशी हाक मारतात.

माध्यमांनी दिलेल्या वृत्तानुसार, सलमानने स्वत: एका मुलाखतीमध्ये आपल्या पहिल्या कमाईबाबत माहिती दिली होती. त्याने एका मुलाखतीत सांगितलं होतं, की त्याची पहिली कमाई 75 रुपये होती. मुंबईतल्या ताज हॉटेलमध्ये एका कार्यक्रमात त्याने बॅकग्राउंड डान्सर म्हणून काम केलं होतं. या कामासाठी त्याला 75 रुपये मोबदला मिळाला होता. 'मैंने प्यार किया' या हिट चित्रपटासाठी त्याला फक्त 31 हजार रुपये मानधन मिळालं होतं. सलमान खानची एकूण संपत्ती ही सध्याच्या घडीला 2000 कोटी असल्याचं म्हटलं जातंय.