श्रेया घोषालच्या चाहत्यांना धक्का, IND VS PAK तणावामुळे घेतला मोठा निर्णय!

श्रेया घोषालने ही माहिती स्वतः तिच्या इन्स्टाग्रामवर शेअर केली. या पोस्टमध्ये ती म्हणते, “माझ्या प्रिय चाहत्यांनो, जड अंतःकरणाने सांगते आहे की हा कार्यक्रम सध्या आपल्या देशात सुरु असलेल्या परिस्थितीमुळे पुढे ढकलला जात आहे. एक कलाकार म्हणून मला हा शो खूप खास वाटतो, पण एक नागरिक म्हणून, देशासोबत उभं राहणं हे माझं प्रथम कर्तव्य आहे.”

तिच्या या निर्णयामुळे अनेक चाहते थोडे नाराज असले तरी, तिच्या देशभक्तीच्या भावना पाहून तिचं कौतुकही होत आहे. श्रेया पुढे म्हणते, “हा शो रद्द केलेला नाही, फक्त पुढे ढकललेला आहे. आपण लवकरच भेटू, आणि अधिक जोमाने मैफिल गाजवू.”

श्रेया घोषालने हेही स्पष्ट केलं आहे की, जे प्रेक्षक आधीच तिकीट खरेदी करून ठेवले आहेत, त्यांच्या तिकिटांवर पुढील नवीन तारखेसाठी प्रवेश मिळेल. BookMyShow हे या कार्यक्रमाचे अधिकृत तिकीट भागीदार असून, सर्व तिकीटधारकांशी लवकरच संपर्क साधून नवीन तारखेची माहिती देण्यात येईल. श्रेया घोषालने आपल्या पोस्टचा शेवट करताना चाहत्यांना आवाहन केलं, “तोपर्यंत कृपया सुरक्षित राहा, एकमेकांची काळजी घ्या. आपल्या प्रेमासाठी आणि समजुतीसाठी धन्यवाद.”