Suraj Chavan: घर झालं, सिनेमा झाला, आता झापूक झुपूक इच्छा! सूरज चव्हाणला हवंय काय?

पुणे : बिगबॉस मराठी फेम सूरज चव्हाण लवकरच आपला पहिला चित्रपट ‘झापुक झुपुक’ घेऊन प्रेक्षकांच्या भेटीला येत आहे. 25 एप्रिल रोजी हा सिनेमा महाराष्ट्रभर प्रदर्शित होणार आहे. सध्या या चित्रपटाचा ट्रेलर सोशल मीडियावर जोरदार गाजत आहे. ट्रेलरचं अनावरण अभिनेता रितेश देशमुख यांच्या हस्ते करण्यात आलं आणि त्याला प्रेक्षकांनी भरभरून प्रतिसाद दिला आहे. लोकल18 सोबत बोलताना सूरजने चित्रपट आणि करियरबाबत मनमोकळ्या गप्पा मारल्या.

‘झापुक झुपुक’ या सिनेमात सूरज एका हटके भूमिकेत दिसणार आहे, त्यामुळे चाहत्यांमध्ये उत्सुकता वाढली आहे. हा चित्रपट केदार शिंदे यांनी दिग्दर्शित केला असून, बिग बॉसच्या घरात असतानाच सूरजच्या या चित्रपटाची घोषणा करण्यात आली होती. या संधीबद्दल बोलताना सूरज म्हणाला, “केदार सरांनी मला हा मोठा प्लॅटफॉर्म दिला, यासाठी मी त्यांचा मनापासून आभारी आहे. बिग बॉसच्या घरात असताना ‘झापुक झुपुक’ हे गाणं माझ्या स्टाईलमध्ये हिट झालं होतं आणि तेच नाव असलेला हा चित्रपट आता साकारतो आहे, याचा आनंद वेगळाच आहे.”