vietnam: 50 लाख लोकांची हत्या, 58 हजार अमेरिकन सैनिकांचा मृत्यू, पण तरीही 40 पट श्रीमंत आहे देश

या विध्वंसानंतर व्हिएतनामने 1980 च्या दशकात पुढे जाण्याचा निर्णय घेतला. हा देश पुन्हा स्वतःच्या पायावर उभा राहिला. भविष्यात आपण कोणत्याही जागतिक गटाचा भाग होणार नाही, अशी खूणगाठ या देशाने बांधली. आपल्या नागरिकांच्या भल्याचा विचार करून पुढे जाण्याचा विचार तत्कालीन नेत्यांनी मांडला. वसाहतवादी शक्तींपासून स्वातंत्र्य आणि लोकांमध्ये एकता प्रस्थापित करण्याची दोन उद्दिष्टं समोर ठेवून या देशाने आपला प्रवास सुरू केला. या धोरणाला अनुसरून या देशाने अमेरिका, चीन आणि रशियाशी आपले संबंध सुधारले आहेत.

आपला रक्तरंजित इतिहास विसरून व्हिएतनाम पुढे जात आहे. 1986मध्ये तिथे आर्थिक सुधारणांचं धोरण (डोई मोई) लागू केलं गेलं. या आर्थिक सुधारणांमुळे आज या देशाचं दरडोई उत्पन्न भारतापेक्षा जास्त आहे. 1986 च्या सुमारास, व्हिएतनामचं दरडोई उत्पन्न फक्त 100 डॉलर होतं. सध्या ते 4300 डॉलर प्रति व्यक्ती एवढं आहे. हा आकडा भारताच्या दरडोई उत्पन्नापेक्षा जास्त आहे. म्हणजेच या देशाने 40 वर्षांपेक्षा कमी कालावधीत 40 पटींनी प्रगती केली आहे. तिथल्या गरिबीचं प्रमाण फक्त तीन टक्के आहे. व्हिएतनामची जगातल्या सर्वांत मोठ्या उदयोन्मुख अर्थव्यवस्थांमध्ये गणना केली जाते.

दक्षिण चीन समुद्रात चीनचा प्रभाव रोखण्यासाठी आणि आंतरराष्ट्रीय सागरी वाहतूक अडथळामुक्त ठेवण्यासाठी व्हिएतनामची भूमिका अत्यंत महत्त्वाची आहे. अशा स्थितीत इंडो-पॅसिफिक क्षेत्रात चीनच्या प्रभावावर नियंत्रण ठेवण्यासाठी व्हिएतनामची भूमिका भारतासाठी अत्यंत महत्त्वाची आहे.