धक्कादायक! 14 वर्षांचं पोर 'हार्ट अटॅक'ने गेलं; डॉक्टरांनी व्यक्त केली चिंता, म्हणाले, "लहान मुलांमध्येही..."

ही घटना गुरुवारी सकाळी सुमारे 8:30 वाजता घडली. साई टाॅयलेटमधून परतल्यानंतर त्याला डोकेदुखीचा त्रास होऊ लागला. आई-वडिलांना वाटलं की ही सामान्य डोकेदुखी आहे, म्हणून त्यांनी त्याच्या डोक्याला तेल लावून आराम करायला सांगितलं. पण थोड्याच वेळात वेदना असह्य झाल्या. चिंतेत पडलेल्या कुटुंबियांनी तात्काळ त्याला बारिडीहा येथील मर्सी हॉस्पिटलमध्ये नेलं. तिथे त्याची तब्येत आणखी बिघडायला लागली; ऑक्सिजन दिल्यानंतरही तो बेशुद्ध पडला. डॉक्टरांनी गंभीर अवस्था पाहून त्याला टाटा मेन हॉस्पिटल (TMH) मध्ये रेफर केलं.

टीएमएचमध्ये पोहोचेपर्यंत रात्रीचे 9:30 वाजले होते, पण तोपर्यंत खूप उशीर झाला होता. डॉक्टरांनी साईला मृत घोषित केलं. मुलाच्या अकाली निधनामुळे विजय नंदन आणि त्यांचं कुटुंब खूप दुःखात आहे. साईचे काका सच्चिदानंद यांनी सांगितलं की, डॉक्टरांच्या अहवालानुसार साईचा मृत्यू हृदयविकाराच्या झटक्याने झाला. पूर्णपणे निरोगी आणि हसमुख मुलगा अचानक जग सोडून कसा गेला, हे कुटुंबियांना अजूनही स्वीकारता येत नाहीये.