Video: मेकअप आर्टिस्ट व्हायचंय? जाणून घ्या खास कोर्स आणि टिप्स

या शिक्षणामुळं सेलिब्रिटी स्टायलिंग पासून कॉर्पोरेट्समधील उच्चपदस्थ व्यक्तिंचे स्टायलिंग करू शकतात. चित्रपट, टीव्ही, क्रीडापटू, कॉर्पोरेट बॉसेस, उ्द्योजक, उच्चपदस्थांचे कुटुंबीय, शेकडो मालिकांधील हजारो पात्रे, असंख्य रिॲलिटी शोमधील शेकडो स्पर्धक आणि परीक्षक आदींसाठी स्टायलिस्ट्सची गरज मोठी आहे. त्यामुळे या क्षेत्रात हिंमतीने आणि हिकमतीने शिरल्यास चांगल्या उत्पन्नासह लोकांच्या गळ्यातील ताईत बनता येणे शक्य आहे, असं मेकअप आर्टिस्ट ऋतुजा सांगतात.

या स्टायलिंग आणि मेकअप तज्ज्ञांची मागणी उत्तरोत्तर वाढत चालली आहे. वेगवेगळ्या अकॅडमींनी ब्रायडल मेकअप, ओकेजन मेकअप, फॅन्टसी मेकअप, हाय डेफिनेशन मेकअप, अल्टिमेट एअर ब्रश मेकअप असे ॲडव्हान्स्ड अभ्यासक्रम सुरु केले आहेत. शिवाय डे ॲण्ड नाईट मेकअप, पार्टी मेकअप, एंगेजमेंट मेकअप, ओकेजन मेकअप, कॉर्पोरेट मेकअप, एव्हरी डे मेकअप असे मुलभूत अभ्यासक्रम सुरु केले आहेत. अनेक ब्युटी मेकअप ट्रेनिंग आणि एज्युकेशन अकादमींमधून मूलभूत आणि प्रगत अभ्यासक्रम घेऊन प्रमाणपत्रे मिळवता येतात. यामुळे तुम्हाला स्वत:चा स्टार्टअप सुरु करुन तुमची ओळख सिद्ध करता येईल. यासाठी सरकारकडून कौशल्य विकास योजनेंतर्गत असे अभ्यासक्रमही चालवले जात आहेत.

मेकअप आर्टिस्ट्री हा क्रिएटिव्ह फिल्डमधील चांगला करिअर पर्याय आहे. मेकअप शिक्षण आता अनेक लोकांसाठी करिअरचा मार्ग बनला आहे. यासोबतच ब्युटी इंडस्ट्रीमध्ये नशीब आजमावणाऱ्यांची संख्याही वाढत आहे. परंतु काही वेळा या क्षेत्रात सर्रास फसवणूक होताना देखील दिसून येत आहे. भरमसाठ पैसे आकारून देखील काहींना योग्य पद्धतीने शिकवलं जात नाही. त्यामुळे जर तुम्ही एखाद्या मेकअप ॲकॅडेमीमध्ये प्रवेश घेत असाल तर त्याविषयी सुरुवातीला माहिती जाणून घेणं गरजेचं असल्याचं देखील आल्हाट यांनी सांगितलं.