आता कुणीही बनवू शकतो दोन मिनिटांत चपाती, कोल्हापूरच्या तरुणाचा अनोखा फंडा

ही चपाती मशीनच्या सहाय्याने 80 टक्के भाजलेली असून 20 टक्के भाजायची बाकी असते. अशा अर्ध्या कच्च्या स्वरूपात ही चपाती थंड करून पॅक केली जाते. ही चपाती 80 टक्के भाजलेली असल्याने बाहेर घेऊन जाऊन तिथे हवी तेव्हा भाजून खाता येऊ शकते. ही चपाती सामान्य तापमानात दोन दिवस तर डीप फ्रिजमध्ये 12 दिवस चांगली राहू शकते, असेही ऋषिकेशने सांगितले.

फ्रोजन चपाती पूर्णपणे मशीनच्या सहाय्याने बनवली जाते. विकतचे गहू दळून पीठ मळण्यापासून ते चपातीची पॅकिंगपर्यंत सर्व कामे मशीनद्वारे केली जातात. सुरुवातीला दळलेले गव्हाचे पीठ मशीन मध्ये मळून घेतले जाते. त्यानंतर दुसऱ्या एका मशीनमध्ये आधीच सेट केलेल्या वजनाचे गोळे तयार केले जातात. हे तयार केलेले गोळे एका मोठ्या हिटिंग मशीन मधील स्टीलच्या तव्यावर ठेवावे लागतात. या मशीनमध्ये चपाती प्रेस करून भाजली जाते. या ठिकाणी चपातीमधील सर्व ओलावा निघून जाऊन ती 80 टक्के भाजली जाते. पुढे ही चपाती कन्व्हेयर वरुन थंड केली जाते. कन्व्हेयर बेल्टवरून चपाती पुढे जातानाच तिला कोरडे पीठ लावले जाते. शेवटी ही चपाती पॅक करून विक्रीसाठी तयार होते, अशी माहिती ऋषिकेशने दिली.

फ्रोजन चपाती व्यवसायात ऋषिकेशने चांगलीच पकड घेतली आहे. ही फ्रोजन चपाती कोल्हापुरातील अनेक ग्राहक विकत घेतच आहेत. मात्र महाराष्ट्रातील नाशिक, मुंबई अशा मोठ्या शहरांसह कर्नाटक, गोवा, तेलंगणा अशा राज्यांमध्ये देखील या फ्रोजन चपात्या पाठवण्यात आल्या आहेत. तसेच आठवड्यात किमान 300 ते 400 चपात्या भारताबाहेर देखील पाठवल्या जातात, असेही ऋषिकेश सांगतो.