डोकेदुखी आणि थकव्याला हलक्यात घेऊ नका, गंभीर आजाराचं असू शकतं लक्षण

हिवाळा सुरू होऊन महिन्यापेक्षा जास्त कालावधी उलटला आहे. मात्र, वातावरणात अपेक्षित चांगले बदल झालेले नाहीत. देशातील बहुतांश भागांमध्ये दिवसभरात तिन्ही ऋतुंचा अनुभव येत आहे. सकाळच्या वेळी वातावरणात गारवा जाणवत आहे तर दुपारी ऊन आणि अंशत: ढगाळ वातावरण दिसत आहे. यामुळे अनेकजण आजारी पडत असून दवाखान्यांमध्ये रुग्णांची संख्या वाढली आहे. या रुग्णसंख्येमध्ये न्यूमोनियाचे रुग्ण देखील मोठ्या प्रमाणात आहेत. न्यूमोनिया हा फुफ्फुसाचा संसर्ग आहे. न्यूमोनिया झाल्यानंतर कफ, खोकला, ताप, थंडी वाजून येणं आणि श्वास घेण्यास त्रास होणं, यांसारख्या समस्या जाणवतात. न्यूमोनियाची तीव्रता सौम्य ते प्राणघातक असू शकते. त्यामुळे त्याची कारणं, लक्षणं, प्रतिबंधात्मक उपाय आणि उपचारांबद्दल माहिती असणं फार महत्त्वाचं आहे. 'एनडीटीव्ही'ने या बाबत वृत्त प्रसिद्ध केलं आहे.