Coffee : रोज किती कप कॉफी पिणे योग्य? अतिसेवनाने होऊ शकतात गंभीर आजार

तज्ज्ञांच्या मते, रोज 400 मिलीग्रॅमपेक्षा जास्त कॅफेन घेणं योग्य नसतं. एका कॉफीमध्ये सरासरी 95 मिलीग्रॅम कॅफेन असतं. म्हणजे दिवसाला चार कप कॉफी तुम्ही पिऊ शकता, मात्र त्यापेक्षा जास्त कॉफी त्रासदायक ठरू शकते. चार ते सहा वर्षांच्या मुलांसाठी हे प्रमाण 45 मिलीग्रॅम आणि सात ते 12 वर्षांच्या मुलांसाठी 70 मिलीग्रॅम आहे. किशोरवयीन मुलं अभ्यास करताना जागरणासाठी कॉफी पितात, मात्र त्यांनी दोन कप म्हणजे 100 ते 200 मिलीग्रॅम कॉफी पिणं योग्य असतं.

उच्च रक्तदाब असेल, तर कॅफेनचं अतिसेवन धोकादायक ठरू शकतं. कॅफेन ताबडतोब ऊर्जा देतं, त्यामुळे उच्च रक्तदाब असेल, तर रक्तदाब लगेचच वाढू शकतो. याचमुळे हृदयरोगाचा धोकाही उत्पन्न होऊ शकतो. कॉफीच्या अतिरिक्त सेवनानं शरीराचं तापमान वाढतं. त्यामुळे रक्तवाहिन्यांनाही वेगानं काम करावं लागतं. यामुळे हृदयावर ताण येतो आणि हृदयाचे आजार उद्भवू शकतात. कॉफीचं अतिसेवन पोटाच्या विकारांना आमंत्रण देऊ शकतं. जास्त कॉफी प्यायल्याने पोटात गॅस्ट्रिक हॉर्मोन जास्त तयार होतात. यामुळे गॅसेस, पित्त, डायरिया अशा आजारांचा धोका वाढतो.