उन्हाळ्यात उष्माघाताचा धोका, हे घरगुती आयुर्वेदिक उपाय माहिती आहेत का? Video

सूर्याची प्रखर किरणे आणि अति कोरडी हवा याने शरीरातील जलीय अंश कमी होतो. त्यामुळे उन्ह लागणे, ताप, लघवीला जळजळ, उष्णता वाढणे, थकवा, ग्लानी, उत्साह कमी होणे, नाकातून रक्त येणे, छातीत जळजळ, जुलाब-हगवण आदी तक्रारींना समोरे जावे लागते. या काळात शरीराला आतून शीतल ठेवण्यासाठी काही घरगुती आयुर्वेदिक उपाय लाभदायी ठरतात.

1. गुलकंद, आवळ्याचा मुरंबा, पेठा सकाळी उपाशी पोटी खावे. 2. फळांमध्ये टरबूज, खरबूज, संत्रे, मोसंबी, डाळिंब, आंबा खाणे लाभदायक ठरते. 3. कोकम, लिंबू आदींचे सरबत, नारळ पाणी, ताक, पुदिना सरबत, धन्याचे पाणी आवर्जून प्यावे. 4. खजूर, काळी मनुका, खडीसाखर पाण्यात भिजवून ते पाणी पिल्याने उष्णता कमी होते. 5. माठात वाळा/खसचे मूळ टाकणे. घराबाहेर पडण्या आधी 1 ग्लास पाणी प्यावे.

उन्हाळ्यात अति तिखट, हिरवी मिरची, शिळे अन्न, अति चहा-कॉफी, मसालेदार, तळलेले पदार्थ, कोल्ड ड्रिंक्स टाळावेत, असे डॉ मयूर कातोरे सांगतात. सध्याच्या काळात उन्हाची तीव्रता वाढली आहे. त्यामुळे उष्माघात किंवा उष्णतेच्या समस्यांवर उपाय म्हणून डॉक्टरांनी सांगितलेल्या सर्व टिप्स लक्षात ठेवून काळजी घेणे गरजेचे आहे.