डोळ्यांमध्ये टोचल्यासारखं होतंय? साथीने घातलं थैमान, कशी घ्यावी काळजी Video

डोळे येण्याची लक्षणे कोणकोणती आहेत याबद्दल डॉ. संजय पाटील सांगतात की, दोन्ही डोळे लाल होणे, डोळ्यांमध्ये टोचल्यासारखे जाणवणे, डोळ्यांतून वारंवार पाणी येणे तसेच पापण्यांना सूज येणे ही लक्षणे आढळल्यास डोळे येण्याचा आजार उद्भवतो. या आजाराची लागण मुख्यतः पावसाळ्यात होते. डोळे आल्यास लवकरात लवकर उपचार घेणे गरजेचे असते. कोणतेही घरगुती उपाय न करता नेत्रतज्ज्ञांचा सल्ला घ्यावा.

डोळे येणे हे व्हायरल इन्फेक्शनचा प्रकार असल्याने याला ठराविक औषधे नाहीत. पेशंटनुसार नेत्रतज्ज्ञ विशिष्ट औषधे देतात. यामध्ये पेशंटला 7 दिवस डोळ्यांची काळजी घेणे, डोळे स्वच्छ ठेवणे, गॉगल वापरणे ही खबरदारी घेणे आवश्यक असते. या आजाराचे सेकंडरी इन्फेक्शन होऊ नये म्हणून नेत्रतज्ज्ञ अँटिबायोटिक्स, ड्रॉप्स तसेच लुब्रिकेटिंग ड्रॉप्सचा वापर करतात.

याचबरोबर डोळे आलेल्या पेशंटच्या डोळ्यांत पाहिल्याने डोळे येतात हा पूर्णतः गैरसमज आहे. डोळे आलेल्या व्यक्तीला हात लागल्यास आणि त्यानंतर आपल्या हातांचा संपर्क डोळ्यांशी झाल्यास डोळे येण्याचे इन्फेक्शन होते. हा आजार सौम्य आजार आहे. 100 टक्क्यांपैकी 2 ते 3 टक्के पेशंटमध्ये हा आजार गंभीरतेकडे वळू शकतो. या गंभीर प्रकारात 7 दिवसानंतर आजाराच्या दुसऱ्या फेजमध्ये बुबुळावरती 'किराटायसिस' नावाचा आजार सुरू होतो. यामध्ये बुबुळावरती छोटे छोटे स्पॉट्स येतात आणि ते रिकव्हर होण्यासाठी 3 ते 4 महिन्यांचा कालावधी लागतो, अशी माहिती नेत्रतज्ज्ञ डॉ. संजय पाटील यांनी दिली.