Diwali : खास दिवाळीसाठी हेअर केअर टिप्स, या सोप्या टिप्स वापरा, टाळू राहिल स्वच्छ, केस होतील सेट

दिवाळीच्या तयारीत, केस धुतल्यानंतरही किंवा काही तासांनी डोक्याची त्वचा तेलकट आणि चिकट वाटते का?  कारण या तेलकटपणामुळे आवडती हेअरस्टाईल नीट सेट करता येत नाही. पण यावर काही सोप्या टिप्स लक्षात ठेवा.

स्वयंपाकघरात उपलब्ध असलेले पाच प्रभावी घरगुती उपाय तुम्हाला उपयोगी ठरतील. त्यातला पहिला पर्याय म्हणजे - लिंबू आणि पाण्याचं मिश्रण - लिंबात सायट्रिक एसिड असतं, यामुळे टाळूच्या पीएच पातळीचं संतुलन आणि अतिरिक्त तेल काढून टाकण्यास मदत होते. एक कप पाण्यात दोन चमचे लिंबाचा रस मिसळा. केस धुतल्यानंतर, या मिश्रणानं टाळूला हलक्या हातानं मालिश करा. यामुळे तेल काढून टाकायला मदत होते, टाळू स्वच्छ राहतो आणि थोडीशी चमक येते.

कोरफडीचा गर - कोरफड केवळ त्वचेसाठीच नाही तर तेलकट टाळूसाठी देखील उत्तम आहे. यामुळे टाळूची जळजळ कमी होते आणि तेलाचं उत्पादन नियंत्रित करण्यास मदत होते. यासाठी दोन-तीन चमचे कोरफडीचा ताजा गर घ्या आणि त्यात एक चमचा लिंबाचा रस मिसळा. हे मिश्रण शॅम्पू करण्यापूर्वी अर्धा तास आधी टाळूला लावा. यामुळे चिकटपणा कमी होतो आणि केस हलके होतात.

अ‍ॅपल सायडर व्हिनेगर - अ‍ॅपल सायडर व्हिनेगर हे एक उत्कृष्ट क्लॅरिफायर आहे. यामुळे टाळू कोरडा होत नाही, साबण किंवा शॅम्पूचे अवशेष आणि अतिरिक्त तेल पूर्णपणे काढून टाकलं जातं. यासाठी दोन चमचे अ‍ॅपल सायडर व्हिनेगर दोन कप पाण्यात मिसळा. शॅम्पू केल्यानंतर, हे मिश्रण केस धुण्यासाठी शेवट वापरा. ​​नंतर स्वच्छ पाण्यानं केस धुवू नका याची काळजी घ्या. अ‍ॅपल सायडर व्हिनेगरमुळे कोंडा आणि तेल दोन्ही नियंत्रित राहतं आणि केस चमकदार दिसतात.

ग्रीन टी - ग्रीन टीमधे भरपूर प्रमाणात अँटीऑक्सिडंट्स असतात. यामुळे तेल उत्पादक ग्रंथींना शांत करण्यास मदत होते. दोन ग्रीन टी बॅग्ज एका कप गरम पाण्यात दहा मिनिटं भिजवा. पाणी थंड झाल्यावर ते स्प्रे बाटलीत ओता. हे पाणी शॅम्पू करण्यापूर्वी किंवा नंतर टाळूवर स्प्रे करा आणि पंधरा मिनिटांनी धुवा.

हे टाळूचे आरोग्य सुधारते आणि तेलाचे उत्पादन कमी करते.

बेकिंग सोडाचा ड्राय शॅम्पू म्हणून वापर - केस धुण्यासाठी वेळ नसेल आणि केस खूप तेलकट दिसत असतील, तर बेकिंग सोडा हा एक जलद उपाय आहे. यामुळे तेल लगेच शोषून घेतलं जातं. तळहातावर थोडासा बेकिंग सोडा घ्या. तो तेलकट भागांवर हलक्या हातानं घासून घ्या आणि हळूवारपणे झटकून टाका. यामुळे अतिरिक्त तेल त्वरित शोषून घेतलं जातं. याचा वापर गरजेपुरता किंवा आठवड्यातून एकदाच करा. टाळू वारंवार तेलकट होत असेल तर केसांना जास्त वेळा स्पर्श करणं टाळा आणि नियमितपणे कंगवा धुवा.