फणीवर गाणी वाजवण्याची अनोखी कला, मुंबईकर कलाकाराची थेट लिम्का बुकात नोंद, Video

मुंबई: हार्मोनियम, ऑर्गन, सतार, विणा ही सूरवाद्यं.. तबला, ढोलकी, डफ, मृदूंग ही तालवाद्यं.. बासरी, सनई, तुतारी ही सुषिरवाद्यं.. वाद्यांचं हेच वर्गीकरण आपण खूप पूर्वीपासून करत आलोय. पण आपल्या रोजच्या वापरातला कंगवा हे सूर, ताल आणि सुषिरवाद्यही आहे. हे किती जणांना माहीत आहे? कंगव्याचा भांग पाडणं इतकाच उपयोग आपल्याला माहीत आहे. पण एका कलाकाराला कंगव्यातले सूर, ताल, लय दिसले आणि त्यावर संगीत वाजवण्याचा प्रयत्न केला. फणीवर गाणी वाजवण्याची अनोखी कला मुंबईकर कलाकाराने आत्मसात केली. 2008 साली या आगळ्या-वेगळ्या संगीत साधनेची दखल लिम्का बुक ऑफ रेकॉर्ड्सनही घेतली. त्यामुळे आणखी एक मराठी नाव विक्रमादित्यांच्या यादीत मानानं जाऊन बसलं. ते नाव म्हणजे 61 वर्षीय शशिकांत खानविलकर होय.