आरोग्याचा खजिना, झटपट बनवा तांदुळजा भाजी, रेसिपीचा संपूर्ण Video

सुरुवातीला तांदळीची भाजी नीट निवडून घ्यावी. त्यानंतर ती 2–3 वेळा स्वच्छ पाण्याने धुवून घ्यावी, जेणेकरून माती किंवा घाण पूर्णपणे निघून जाईल. धुतलेली भाजी चाळणीत ठेवून अतिरिक्त पाणी पूर्णपणे निथळू द्यावे. कढईत आवश्यकतेनुसार तेल घालून ते गरम करावे. तेल गरम झाल्यावर त्यात मोहरी टाकून ती तडतडू द्यावी. त्यानंतर जिरे, बारीक चिरलेली हिरवी मिरची आणि ठेचलेला लसूण घालून फोडणी द्यावी.

लसूण हलका सोनेरी रंगाचा झाला की त्यात थोडासा हिंग घालून सर्व साहित्य नीट परतून घ्यावे. यानंतर निथळलेली तांदळीची भाजी कढईत घालावी आणि मध्यम आचेवर परतायला सुरुवात करावी. सुरुवातीला भाजीचे प्रमाण जास्त दिसेल, मात्र परतताना वाफ निघत गेल्याने तिचे प्रमाण हळूहळू कमी होत जाते. भाजी साधारण निम्म्यावर आली की चवीनुसार मीठ घालावे. त्यानंतर भाजीमध्ये शेंगदाण्याचा कूट घाला. सर्व साहित्य एकजीव होईपर्यंत नीट मिसळा. भाजी पाणी आटेपर्यंत शिजवून घ्यावी. भाजी पूर्ण शिजल्यानंतर गॅस बंद करावा. तयार झालेली तांदळीची भाजी ज्वारीच्या किंवा बाजरीच्या भाकरीसोबत, तसेच वरण-भातासोबतही खाण्यास अतिशय चविष्ट लागते.