Special Train: उत्तरेतील प्रवाशांना रेल्वेचे मोठे गिफ्ट, जालन्यातून धावणार विशेष रेल्वे गाडी, पाहा वेळापत्रक

गेल्या महिनाभरापासून बंद असलेली जालना-छपरा स्पेशल रेल्वे 27 ऑगस्टपासून पुन्हा धावणार आहे. रेल्वे बोर्डाने यासंदर्भात आदेश जारी केले आहेत. ही स्पेशल रेल्वे 26 नोव्हेंबरपर्यंत सुरू राहणार आहे. ही रेल्वे सुरू करण्यासाठी रेल्वे प्रशासनाला अनेक निवेदने देण्यात आली होती, तसेच आंदोलनही करण्यात आले होते.

जालना, छत्रपती संभाजीनगरसह मराठवाड्यात उत्तर प्रदेश, बिहार आणि झारखंड राज्यांतील मोठ्या संख्येने नागरिक रोजगारासाठी राहतात. दिवाळी, छठ पूजा, होळी यांसारख्या सणांदरम्यान ते आपल्या गावी जातात. जालना किंवा छत्रपती संभाजीनगर येथून थेट रेल्वे नसल्यामुळे प्रवाशांना मनमाड किंवा जळगाव येथून रेल्वेने जावे लागते. जालना ते छपरा रेल्वेमुळे प्रवाशांना दिलासा मिळणार आहे.