Valentine Day: खरंच प्रेम आंधळं असतं? तुमचेही डोळे पाणावतील अशी डोळस Love Story

सोलापूर – ‘प्रेम म्हणजे प्रेम म्हणजे प्रेम असतं तुमचं आमचं अगदी सेम असतं,’ असं मंगेश पाडगावकर यांनी कवितेच्या माध्यमातून म्हटलंय. पण खरच तुमचं आमचं सेम असतं का हा प्रश्न आहे? कारण सोलापूर शहरातील निराळे वस्ती येथील एक अंध प्रेमी जोडपं गेल्या दोन वर्षांपासून सुखी संसार करत आहे. खरंतर त्यांच हे प्रेम डोळस व्यक्तींना देखील लाजवणारं असून त्यांना डोळसपणे प्रेम करायला भाग पडणारं आहे. पांडुरंग खरसोडे आणि उज्ज्वला खरसोडे असे या अंध प्रेमी युगलाचे नाव असून या दोघांची प्रेम कहाणी नक्कीच प्रेरणा देणारी आहे. व्हलेंटाईन डेनिमित्त लोकल18 च्या माध्यमातून याच डोळस जोडप्याशी संवाद साधला आहे.

पांडुरंग खरसोडे आणि उज्ज्वला खरसोडे दोघेही दृष्टिहीन. चंद्रभागाबाई यलगुलवार प्रशालेत शिकत होते. नॅशनल असोसिएशन फॉर द ब्लाइंड या संस्थेच्या माध्यमातून प्रशिक्षण घेताना गप्पा झाल्या. एकमेकांना पाहूच शकत नव्हते. परंतु मने अशी जुळली की, एकमेकांशिवाय राहू शकत नव्हते. मात्र दोघेही अंध असल्याने घरच्यांना चिंता होती. त्यामुळे काही काळ विरोध देखील झाला. परंतु, प्रेम फुलत गेलं आणि एके दिवशी लग्न ठरलं. इतके झटपट की, सकाळी 9 वाजता साखरपुडा, दुपारी 12 वाजता हळद आणि सायंकाळी अक्षता पडल्या, असं उज्ज्वला सांगतात.