2 सख्ख्या बहिणींनी घरातच तयार केला 'मृत्यूचा सापळा', 20 हजारांमध्ये 'नकोशी'ची करायच्या हत्या!

छत्रपती संभाजीनगर:  महिनाभराच्या अंतराने दुसऱ्यांदा उघडकीस आलेल्या गर्भपाताच्या रॅकेटने छत्रपती संभाजीनगर शहराला हादरवून टाकलंय. दोन सख्ख्या बहिणी आणि एका नर्सने मिळून घरातच मृत्यूचा व्यापार मांडला होता. ७० ते ८० हजार रुपयांचं पॅकेज देऊन 'नकोशी'ची गर्भातच हत्या केली जात होती. या रॅकेटचे धागेदोरे आता सिल्लोडच्या एका डॉक्टरापर्यंत पोहोचले असून पोलिसांनी मोठी कारवाई केली आहे. आता अवैध गर्भपात रॅकेटचे धाकेदोरे मराठवाडभर पसरले असल्याची शक्यता आहे. छत्रपती संभाजीनगर आणि सिल्लोड तालुक्यात रुग्ण आणले जात असल्याची माहिती आता समोर आली आहे.

छत्रपती संभाजीनगरचा सातारा परिसर... एका वृद्ध मातेच्या घरात तिच्याच दोन लेकींनी मृत्यूचा भयानक सापळा रचला होता. वर्षा जाधव आणि उज्ज्वला गायकवाड या दोन सख्ख्या बहिणींनी शहरात फिरतं गर्भपात केंद्रच सुरू केलं होतं. वर्षा ही पेशाने नर्स आहे, तर उज्ज्वला तिला या कामात मदत करायची. विशेष म्हणजे, संशय येऊ नये म्हणून त्यांनी स्वतःच्या आईच्या घराचा वापर या बेकायदेशीर कृत्यासाठी केला.

पैसे कमवण्यासाठी पोटच्या गोळ्याची हत्या करणाऱ्या या निर्दयी टोळीचा पोलिसांनी पर्दाफाश केला असला, तरी यामागे अजून किती मोठी साखळी आहे, हे आता तपासातच स्पष्ट होईल.