दिवसभर शिमगा पालखी होता अन् रात्री घरी गेल्यावर तो परतलाच नाही, रत्नागिरीतील हृदयद्रावक घटना

मिळालेल्याा माहितीनुसार, रत्नागिरी जिल्ह्यातील दाभोळ गावात ही घटना घडला आहे.  आकाश अरुण वेद्रे (वय २३) असं आत्महत्या करणाऱ्या तरुणाचं नाव आहे.  या तरुणाने राहत्या घरी गळफास घेऊन आत्महत्या केल्याची घटना समोर आली असून गावात हळहळ व्यक्त होत आहे. सणाच्या आनंदात रमलेल्या वातावरणावर अचानक दुःखाची सावली पसरली आहे.

सकाळी जेव्हा कुटुंबीयांनी आकाशला आवाज दिला पण तो बराच वेळ झाला रूममधून बाहेर आला नाही. त्यामुळे रूममध्ये डोकावून पाहिले असता आकाशने गळफास घेतल्याचं लक्षात आलं. हा प्रकार लक्षात येताच कुटुंबीय आणि स्थानिकांनी तातडीने मदत करण्याचा प्रयत्न केला, मात्र तोपर्यंत उशीर झाला होता. घटनेची माहिती मिळताच पोलीस घटनास्थळी दाखल झाले. पंचनामा करून मृतदेह पुढील वैद्यकीय तपासणीसाठी पाठवण्यात आला असून घटनेचा तपास सुरू आहे.

या घटनेमुळे शिमगोत्सवाच्या आनंदावर विरजण पडलं असून दाभोळ गावात शोककळा पसरली आहे. तरुणाच्या अकाली जाण्याने कुटुंबीयांवर दुःखाचा डोंगर कोसळला असून मित्रपरिवार आणि ग्रामस्थांकडून हळहळ व्यक्त केली जात आहे. आकाश वेद्रे या तरुणाने इतक्या टोकाचं पाऊल का उचललं, याचा शोध पोलीस घेत आहेत.