Trending:

अरबी समुद्रात वारं फिरलं! 17 जिल्ह्यांत अलर्ट, 4 दिवस अति मुसळधार पावसाचा इशारा

Published by:Kranti Kanetkar

Last Updated:August 13, 2025 7:07 AM IST

महाराष्ट्रात 13 ते 16 ऑगस्टदरम्यान 17 जिल्ह्यांमध्ये मुसळधार पावसाचा अलर्ट आहे. रायगड, रत्नागिरी, सिंधुदुर्ग हाय अलर्टवर आहेत. मुंबई, ठाणे, पुणे, कोल्हापूर, सातारा येथे पावसाचा जोर वाढणार.

इम्पॅक्ट शॉटतुमचा गेटवे लेटेस्ट न्यूज

उसंत घेतलेल्या पावसानं पुन्हा एकदा आगमन केलं आहे, त्यामुळे हवेत गारवा निर्माण झाला असून उकाड्याने हैराण झालेल्या लोकांना मोठा दिलासा मिळाला आहे. हवामान विभागाने (IMD) महाराष्ट्रात 13 ते १६ ऑगस्टदरम्यान 17 जिल्ह्यांमध्ये मुसळधार ते अति मुसळधार पावसाचा अलर्ट दिला आहे. या काळात विशेषतः कोकण आणि पश्चिम महाराष्ट्रातील अनेक जिल्ह्यांत मुसळधार ते अति मुसळधार पावसाचा इशारा देण्यात आला असून, इतर भागांतही मध्यम पाऊस पडेल, विजांचा कडकडाट आणि वादळी वाऱ्यासह हा पाऊस होईल असा प्राथमिक अंदाज वर्तवण्यात आला आहे.

कोकणात अलर्ट राहण्याच्या सूचना

कोकण किनारपट्टीवरील रायगड, रत्नागिरी आणि सिंधुदुर्ग जिल्ह्यांना हाय अलर्ट देण्यात आला आहे. 15 आणि 16 ऑगस्ट रोजी रायगड, रत्नागिरी दोन जिल्ह्यांत अति मुसळधार पावसाची शक्यता आहे. विजांसह गडगडाटासह 40 किमी प्रतितास वेगाने वारे वाहतील. त्यामुळे विकेण्डला कामाशिवाय घराबाहेर पडू नका, लाँग विकेण्डचा प्लॅन असेल तर जरा जपून कारण पावसामुळे पाणी साचण्याची शक्यता आहे.

मुंबई-ठाण्यात पावसाचा जोर वाढणार

गेल्या काही दिवसांत हलक्या ते मध्यम पावसाचा अनुभव घेतलेल्या मुंबई आणि ठाण्यात पुढील दोन दिवसांत पावसाचा जोर वाढणार आहे. वादळी वाऱ्यासह मुसळधार पाऊस राहणार असल्याने मुंबईकरांनी वेळेचं नियोजन करू घराबाहेर पडावं असं आवाहन केलं आहे. पुणे, कोल्हापूर आणि साताऱ्याच्या घाटमाथा भागांना १६ ऑगस्ट रोजी मुसळधार ते अति मुसळधार पावसाचा अंदाज आहे. काही जिल्ह्यांमध्ये ऑरेंज अलर्ट जारी करण्यात आला आहे.

विदर्भात काय स्थिती?

विदर्भातील चंद्रपूर आणि गडचिरोली जिल्ह्यांत १३ व १४ ऑगस्ट रोजी मुसळधार ते अति मुसळधार पावसाचा अंदाज वर्तवण्यात आला आहे. पालघर, धुळे, नंदुरबार, जळगाव, नाशिक, पुणे आणि कोल्हापूर जिल्ह्यांत मध्यम ते हलक्या स्वरुपाचा पाऊस राहणार आहे. मराठवाड्यातील जालना, परभणी, बीड, हिंगोली आणि नांदेड जिल्ह्यांतही पुढील काही दिवसांत काही ठिकाणी मुसळधार पावसाची शक्यता वर्तवण्यात आली आहे.

view comments

Location :

Mumbai,Maharashtra

First Published :

August 13, 2025 7:07 AM IST

अरबी समुद्रात वारं फिरलं! 17 जिल्ह्यांत अलर्ट, 4 दिवस अति मुसळधार पावसाचा इशारा